Blog

بقلم: محمد ہاشم قاسمى بستوى

الله تعالى سے دعا كرنا، اس سے مغفرت طلب كرنا الله تعالى كو بہت پسند ہے، الله تعالى چاہتے بھى ہيں كہ اس كے بندے اس سے مغفرت طلب كريں، اپنے گناہوں سے الله كے حضور توبہ كريں، اس  كام سے الله تعالى بہت خوش ہوتے ہيں، الله تعالى سورہ غافر آيت نمبر 60 ميں فرماتے ہيں: تم مجھ سے دعا کرو میں تمہاری دعا قبول کروں گا۔ اسى طرح سورہ زمر آيت نمبر 53 ميں الله تعالى فرماتے ہيں: اے میرے بندو!جنہوں نے اپنی جانوں پر زیادتی کی ہے اللہ کی رحمت سے مایوس نہ ہوں،  اللہ تمام گناہوں کو بخش دے گا وہ بڑا ہی غفور رحیم ہے،  اسى طرح الله تعالى سورہ آلِ عمران آيت  نمبر 135 ميں فرماتے ہيں: اور یہ وہ لوگ ہیں کہ اگر کبھی کوئی بےحیائی کا کام کر بھی بیٹھتے ہیں یا (کسی اور طرح) اپنی جان پر ظلم کر گزرتے ہیں تو فورا اللہ کو یاد کرتے ہیں کہ اور اس کے نتیجے میں اپنے گناہوں کی معافی مانگتے ہیں، اور اللہ کے سوا ہے بھی کون ہے جو گناہوں کی معافی دے ؟ اور یہ اپنے کیے پر جانتے بوجھتے اصرار نہیں کرتے۔

قرآن كريم كے ساتھ ساتھ احاديث شريفہ ميں بھى توبہ و استغفار اور الله سے مغفرت طلب كرنے كى بڑى فضيلتيں وارد ہوئى ہيں، مسلم شريف حديث نمبر 2758 ميں حضرت ابوہریرہ  سے روايت ہے کہتے ہیں کہ:  رسول کریم صلی اللہ علیہ وآلہ وسلم نے فرمایا : ايك حديث قدسى ميں الله تعالى فرماتے ہيں: ایک بندے نے گناہ کیا اور پھر کہنے لگا اے میرے پروردگار میں نے گناہ کیا ہے تو میرے اس گناہ کو بخش دے،  اللہ تعالیٰ  فرماتے ہيں: میرا یہ بندہ جانتا ہے کہ اس کا ایک پروردگار ہے جو جس کو چاہتا ہے اور جب چاہتا ہے اس کے گناہ بخشتا ہے، اور جس کو چاہتا ہے اور جب چاہتا ہے اس کے گناہ پر مواخذہ کرتا ہے۔ وہ بندہ اس مدت تک کہ اللہ نے چاہا گناہ سے باز رہا اور اس کے بعد پھر اس نے گناہ کیا اور اس کے بعد پھر اس نے عرض کیا کہ اے میرے پروردگار میں نے گناہ کیا ہے تو میرے اس گناہ کو بخش دے۔ اللہ تعالیٰ نے فرمایا :کیا میرا بندہ یہ جانتا ہے کہ اس کا ایک پروردگار ہے جو گناہ بخشتا ہے اور اس پر مواخذہ کرتا ہے ؟ میں نے اس بندہ کو بخش دیا پس جب تک وہ استغفار کرتا رہے جو چاہے کرے۔

مسلم شريف حديث نمبر 2749 ميں حضرت ابوہریرہ سے مروی ہے کہ نبی کریم صلی اللہ علیہ وآلہ وسلم نے فرمایا:  اس ذات کی قسم جس کے قبضۂ قدرت میں میری جان ہے اگر تم گناہ نہ کروگے تو اللہ ایک ایسی قوم کو لے آئے گا جو گناہ کرے گی پھر اللہ سے معافی مانگے گی تاکہ اللہ انھیں معاف فرمائے۔

ان كے علاوہ اور بہت سى احاديث ميں استغفار کی فضیلت اور گناہوں کی بخشش میں استغفار کی تاثیر کو بیان کيا گيا ہے، جن كو طوالت كى وجہ سے ذكر نہيں كيا گيا ہے، مقصود يہ ہے الله كے بندے الله تعالى سے صدق دل سے مغفرت اور بخشش  كى دعا كريں، اور آئندہ گناہ نہ كرنے كا پختہ ارادہ كريں، اس پختہ عزم كے باوجود اگر خدا نخواستہ كوئى گناہ سرزد ہو جائے تو  فورا الله كے حضور توبہ كريں اور الله سے مغفرت اور بخشش كى دعا كريں،  تو ان شاء الله ان كى دعا ضرور قبول ہوگى، الله تعالى ان كى مغفرت ضرور كريں گے۔

ذيل  ميں قرآن  كريم اور احاديث نبويہ ميں  مغفرت اور بخشش كے بارے ميں وارد شدہ اذكار اور دعاؤں كو ذكر كر رہے ہيں،  اور ساتھ ہى ساتھ اردو ميں ان كا ترجمہ بھى ذكر كيا جا رہا ہے، يقينا  ايك مسلمان كے ليے يہ بڑے كام كى دعائيں ہيں:

مغفرت كى دعائيں قرآنِ كريم سے:

اے پروردگار ! اگر ہم بھول جائیں یا غلطی کر بیٹھیں تو ہم سے مواخذہ نہ فرمانا۔ اور اے ہمارے پروردگار ! ہمارے اوپر اس طرح کا کوئی بار نہ ڈال جیسا تو نے ان لوگوں پر ڈالا جو ہم سے پہلے ہو گزرے۔ اور اے ہمارے پروردگار ! ہم پر کوئی ایسا بوجھ نہ لاد جس کو اٹھانے كى ہم میں طاقت نہ ہو اور ہمیں معاف کر، ہمیں بخش، اور ہم پر رحم فرما، تو ہمارا مولیٰ ہے، پس کافروں کے مقابل میں ہماری مدد کر۔

اے ہمارے پروردگار ! ہمارے گناہوں کو اور ہمارے کاموں میں ہماری زیادتیوں کو معاف کردیجیے، ہمارے قدم کو مضبوط رکھيئے اور کافروں کے مقابلہ میں ہماری مدد فرمائيے۔

اے ہمارے پروردگار ! ہم نے تو اپنے آپ پر بڑی زیادتی کرلی ہے، اگر آپ نے ہمیں معاف نہیں کیا اور ہم پر رحم نہیں فرمایا، تو ہم یقینا بڑے نقصان میں پڑجائیں گے ۔

تو ہی ہمارا کار ساز ہے، تو ہمارے گناہ بخش دے اور ہم پر رحم کر اور تو سب سے بہتر بخشنے والا ہے۔  اور ہمارے لیے اس دنیا میں بھی بھلائی لکھ دے اور آخرت میں بھی ہم تیری طرف رجوع کرچکے۔

ہمارے رب مجھے اور میرے ماں باپ کو اور مومنوں کو اس دن بخش دیجیے گا جب حساب قائم ہوگا۔

اے ہمارے رب ! ہم ایمان لائے تو، تو ہمیں بخش دے اور ہم پر رحم فرما اور تو بہترین رحم فرمانے والا ہے۔

اے ہمارے رب ! ہم کو دوزخ کے عذاب سے بچا لے، بیشک اس کا عذاب بالکل چمٹ جانے والی چیز ہے،  بیشک وہ نہایت برا مستقر اور نہایت ہی برا مقام ہے۔

اے ہمارے رب تیری رحمت اور تیرا علم ہر چیز کو احاطہ کیے ہوئے ہے۔ تو جن لوگوں نے توبہ کی اور تیرے رستے پر چلے، ان کو بخش دے اور دوزخ کے عذاب سے بچا لے۔ اے ہمارے رب ان کو ہمیشہ رہنے کے لیے جنتوں میں داخل کر، جن کا تو نے ان سے وعدہ کیا ہے۔ اور جو ان کے باپ دادا اور ان کی بیویوں اور ان کی اولاد میں سے نیک ہوں ان کو بھی، بیشک تو غالب حکمت والا ہے۔

اور ان کو عذابوں سے بچائے رکھ اور جس کو تو اس دن عذابوں سے بچا لے گا تو یہ بیشک اس پر مہربانی ہوگی اور یہی بڑی کامیابی ہے۔

اے ہمارے پروردگار ! ہماری بھی مغفرت فرمایئے، اور ہمارے ان بھائیوں کی بھی جو ہم سے پہلے ایمان لاچکے ہیں، اور ہمارے دلوں میں ایمان لانے والوں کے لیے کوئی بغض نہ رکھیے۔ اے ہمارے پروردگار ! آپ بہت شفیق، بہت مہربان ہیں۔

اے میرے پروردگار ! مجھ کو، میرے والدین کو اور جو مسلمان ہو کر میرے گھر میں داخل ہوا اس کو، اور تمام مسلمان مردوں اور عورتوں کو معاف فرما دیجئے، نیز آپ ظالموں کی ہلاکت و بربادی کو اور بڑھا دیجئے۔

مغقرت كى دعائيں احاديث نبويہ ميں

حضرت شداد بن اوس، نبی كريم صلی اللہ علیہ وآلہ وسلم سے روایت کرتے ہیں کہ: سید الا استغفاریہ ہے کہ تو کہے، اللھم انت ربی الخ یعنی اے میرے اللہ تو میرا رب ہے تیرے سوا کوئی معبود نہیں تو نے ہی مجھے پیدا کیا اور تیرا ہی میں بندہ ہوں اور میں تیرے عہد اور تیرے وعدہ پر ہوں جتنا ممکن ہے، جو کچھ میں نے کیا۔ اس کی برائی سے میں تیری پناہ مانگتا ہوں اور ان نعمتوں کا میں اقرار کرتا ہوں جو تو نے مجھ پر کی ہیں اور اپنے گناہ کا اقرار کرتا ہوں مجھے بخش دے، تیرے سوا گناہوں کا بخشنے والا کوئی نہیں۔ رسول اللہ صلی اللہ علیہ وآلہ وسلم نے فرمایا کہ:  جس نے یہ کلمات صدق دل سے کہے اور شام ہونے سے پہلے اسی دن مرگیا تو وہ جنتی ہے اور جس نے یہ کلمات صدق دل سے رات میں کہے اور صبح ہونے سے پہلے وہ مرجائے تو جنتی ہے۔

حضرت ابو موسیٰ اشعرى  آنحضرت صلی اللہ علیہ وآلہ وسلم سے روایت کرتے ہیں کہ:  آپ یہ دعا پڑھا کرتے تھے، اے میرے پروردگار میری خطا میری جہالت اور ہر کام میں میری زیادتی کو معاف فرما، کیونکہ آپ مجھ سے بہت زیادہ جانتے ہیں، اے اللہ میری خطا میرے عمداً گناہ، میری جہالت اور فضول باتوں کو معاف فرما، کیونکہ یہ سب میری جانب سے واقع ہوئی ہیں۔ اے اللہ میرے اگلے پچھلے پوشیدہ اور اعلانیہ گناہ معاف فرما کیونکہ آپ ہی اول اور آخر ہیں اور آپ ہر چیز پر قادر ہیں

ابوبکر صدیق  نے رسول اللہ صلی اللہ علیہ وآلہ وسلم سے عرض کیا کہ مجھے کوئی ایسی دعا تعلیم فرمائیے جو میں نے اپنی نماز میں پڑھ لیا کروں آپ صلی اللہ علیہ وآلہ وسلم نے فرمایا کہ یہ پڑھا کرو:  اللَّهُمَّ إِنِّي ظَلَمْتُ نَفْسِي ظُلْمًا کَثِيرًا وَلَا يَغْفِرُ الذُّنُوبَ إِلَّا أَنْتَ فَاغْفِرْ لِي مَغْفِرَةً مِنْ عِنْدِکَ وَارْحَمْنِي إِنَّک أَنْتَ الْغَفُورُ الرَّحِيمُ.

حضرت عبد الله بن عباس  رضي الله عنہ روایت کرتے ہیں:  نبی صلی اللہ علیہ وآلہ وسلم جب رات کو تہجد کی نماز پڑھنے کیلئے کھڑے ہوتے تو فرماتے کہ:  اے میرے اللہ میں نے اپنی گردن تیرے لیے جھکا دی اور میں تجھ پر ایمان لایا تجھی پر میں نے بھروسہ کیا، تیری طرف میں متوجہ ہوا، تیری ہی مدد سے میں نے جھگڑا کیا اور تیری ہی طرف میں نے اپنا مقدمہ پیش کیا، میرے اگلے پچھلے اور ظاہری اور چھپے ہوئے گناہوں کو بخش دے تو ہی آگے اور پیچھے کرنے والا ہے، تو ہی معبود ہے تیرے سوا کوئی معبود نہیں ۔