Blog

 (سلسلہ نمبر: 732)

ترکہ کی تقسیم سے پہلے قرض ادا کیا جائے گا

سوال: محفوظ الرحمن کا انتقال ہوا ان کے ورثا میں ایک بیوی دو لڑکے اور پانچ لڑکیاں موجود ہیں، مرحوم نے اپنے ایک لڑکے کو الگ کردیا تھا جس کا باپ کے علاوہ مستقل کاروبار تھا اور دوسرے بیٹے کے ساتھ مرحوم رہتے تھے، مرحوم نے اپنی زندگی میں اپنے ایک لڑکے جو کہ علاحدہ رہتا ہے اور کاروبار بھی الگ تھا اس سے بطور قرض کچھ رقم ادھار لی تھی انتقال کے بعد علاحدہ رہنے والے لڑکے کا اصرار ہوا کہ والد صاحب نے جو قرض لیا تھا وہ مجھے چاہئے اس لڑکے نے جس کے ساتھ مرحوم رہتے تھے اپنی نجی رقم سے وہ قرض ادا کردیا اب مرحوم کا ترکہ تقسیم ہورہا ہے تو ورثاء کے کتنے کتنے حصے بنیں گے اور لڑکے نے والد کا قرض جو اپنی ذاتی رقم سے ادا کیا ہے اس کو مال متروک سے وضع کیا جائے گا یا نہیں؟

المستفتی: ابو رشدی عارفی، اردو بازار، سہارنپور۔

الجواب باسم الملہم للصدق والصواب: صورت مسئولہ میں بر تقدیر صحت سوال محفوظ الرحمن مرحوم کے ترکہ سے پہلے اس قرضہ کو الگ کیا جائے گا جو انہوں نے اپنے الگ رہنے والے لڑکے سے لیا تھا، اور یہ رقم اس لڑکے کو دی جائے گی جس نے اپنے پاس سے قرض کی ادائیگی کردی ہے، اس کے بعد ما بقیہ ترکہ کو بہتر (72) حصوں میں تقسیم کریں گے، جس میں سے دونوں لڑکوں کو چودہ چودہ (14/14) حصے، پانچوں لڑکیوں کو سات سات (7/7) حصے اور بیوی کو نو (9) حصے ملیں گے۔