Blog

(سلسلہ نمبر: 363)

جائیداد سے محروم کرنا

سوال: کیا فرماتے ہیں مفتیان کرام درج ذیل مسئلہ کے بارے میں کہ رضوان صاحب کے والد جناب ذوالفقار صاحب نے اپنی موروثہ(جو باپ دادا سے ملی تھی) تمام جائداد کو فروخت کر دیا اور اس سے حاصل ہونے والی رقم اپنی بیٹیوں کو دے دیا، رضوان صاحب کو کچھ نھیں دیا اب پوچھنا ہے کہ ذوالفقار صاحب کا ایسا کرنا شرعی اعتبار سے کیسا ہے؟ اس میں رضوان صاحب کا حصہ ھوتا ھے یا نہیں؟ مدلل جواب عنایت فرمائیں۔

المستفتی: محمد اظفر چورسنڈ، جون پور۔

الجواب باسم الملھم للصدق والصواب:

جب تک مورث  (ذو الفقار صاحب) زندہ ہیں تب وہ اپنی جائداد کے مالک ہیں، اس میں ان کی بالغ اولاد کا شرعاً  کوئی حق نہیں ہے، البتہ اگر وہ اپنی زندگی میں اولاد کو ہبہ کرنا چاہیں تو سب کے درمیان برابری کرنی چاہئے، یعنی جتنا اپنی بیٹی کو دے رہے ہیں اتنا ہی بیٹے کو بھی دینا چاہئیے، اگر بلا کسی وجہ کے ساری جائیداد اپنی زندگی میں بیٹی کو دیدیں اور وہ قبضہ کرلے تو وہ مالک ہوجائے گی؛ لیکن ذوالفقار صاحب گنہ گار ہوں گے اس لئے انہیں ایسا نہیں کرنا چاہئیے، حدیث شریف میں آیا ہے کہ: ’’جو شخص اپنے وارث کی میراث قطع کرے گا تو اللہ تعالیٰ جنت میں اُس کی وراثت میں سے قطع کرے گا‘‘۔ (مشکوٰۃ شریف 1/266).

نوٹ: اگر ذو الفقار صاحب اپنے بیٹے رضوان سے کسی ناراضگی کی وجہ سے ایسا کررہے ہیں تو رضوان صاحب کو اپنے والد کے ساتھ حسن سلوک کرنا چاہئیے ان کے حقوق کی ادائیگی ضروری ہے ورنہ رضوان صاحب بھی گنہ گار ہوں گے. اللہ تعالیٰ ہر ایک کو دوسرے کے حقوق ادا کرنے کی توفیق دے۔ (آمین) ۔