Blog

 (سلسلہ نمبر: 517)

مستری کا ٹھیکہ پر زیادہ کام کرنا

سوال: کیا فرماتے ہیں علمائے کرام و مفتیان عظام مسئلہ ذیل میں کہ راج مستری ہو یا کسی بھی شعبے سے منسلک حضرات، روزانہ کی خدمت (کام) کرنے میں ایسی سست روی کا مظاہرہ کرتے ہیں کہ دیکھنے والا (مالک) اسے بہت محنتی تصور کرتے ہیں مگر اسی کو اسی کام کا ٹھیکہ (رقم مختص کرکے کام کی ذمہ داری سونپنے) پر ہفتہ دن کے کام کو کم وقتوں اور دنوں میں پورا کر لیا کرتے ہیں، کیا اس طرح سے سست روی کا مظاہرہ کرنا شرعی حیثیت سے پکڑ کا سبب نہیں بنے گا ؟ اس سلسلے میں رہنمائی فرمائیں کہ شریعت مطہرہ میں گنجائش ہے؟

المستفتی: محمد نفیس سیتاپوری۔

الجواب باسم الملھم للصدق والصواب: اگر کسی کو کام کرنے کے لئے اجرت پر لیا جائے تو اسے چاہئیے کہ امانت و دیانت کا مظاہرہ کرے، بلا وجہ سستی اور کاہلی کرکے کام کو بڑھانا اور زیادہ مزدوری حاصل کرنا جائز نہیں۔

عام طور پر راج مستری روزینہ کام کے لئے ایک وقت متعین رکھتے ہیں اسی کے حساب سے کام شروع اور ختم کرتے ہیں، لیکن اگر ٹھیکہ لے لیتے ہیں تو کام کو پہلے شروع کرتے ہیں اور بعد میں بند کرتے ہیں مزید اضافی محنت بھی کرتے ہیں، اگر اس طرح وہ کام کو جلدی ختم کرلیں تو شرعاً کوئی حرج نہیں، لیکن اگر وہ روزینہ اتنی سستی سے کرتے ہیں کہ مالک ٹھیکہ دینے پر مجبور ہو تو ایسا کرنا درست نہیں۔

    خلاصہ یہ ہے کہ ہر مستری پر یکساں حکم نہیں لگایا جاسکتا، اگر کوئی امانت دیانت کے ساتھ روزینہ یا ٹھیکہ پر کام کررہا ہے تو جائز ہے، اور اگر سامنے والے کو دھوکہ دے رہا ہے تو پھر اس کا عمل شرعاً درست نہیں ہوگا۔