Blog

(سلسلہ نمبر: 545)

وراثت سے محروم کرنا جائز نہیں

سوال: ایک باپ کے صرف چار لڑکی ہیں ایک لڑکی ماں باپ کی خدمت کرتی ہے اور ایک لڑکی ماں باپ سے ناراض ہے، اب معلوم یہ کرنا ہےکہ جو لڑکی ناراض ہےاس کو وراثت سے محروم کیا جا سکتا ہے، اور اسی طرح اس لڑکی کو زیادہ حصہ دیا جا سکتا ہے؟ کیا یا وصیت کی جا سکتی ہے گھر کی یا جنگل کی زمین کی؟ شریعت کے حکم سے مطلع فرمائیں، کرم ہوگا۔

 المستفتی: محمد عالمگیر رحیمی ثم نوریؔ میرٹھی۔

الجواب باسم الملھم للصدق والصواب: کسی وارث کو وراثت سے محروم کرنا جائز نہیں، اگر کوئی محروم کردے تو شرعاً اس کا کوئی اعتبار بھی نہیں ہے، یعنی اگر کچھ مال چھوڑ کر مرا ہے تو  جس وارث کو محروم کیا ہے اس کو بھی شرعی حصہ ملے گا۔

البتہ جو بیٹی والدین کی خدمت کررہی ہے اس کو اپنی زندگی میں کچھ الگ سے دینا چاہے تو دے سکتے ہیں بشرطیکہ دوسری بیٹی کو نقصان پہونچانا مقصود نہ ہو، اور اگر پورا مال زندگی میں ہبہ کردے تو وہ لڑکی مالک تو بن جائے گی لیکن والد گنہ گار  ہوگا اور آخرت میں اس کو جواب دینا پڑے گا۔

اسی طرح وارث کے لئے اگر وصیت کی جائے تو دوسرے ورثاء کی اجازت پر موقوف ہوگی، اگر دوسرے ورثاء راضی ہوں گے تو وصیت پر عمل کیا جائے گا ورنہ نہیں۔