Blog

 (سلسلہ نمبر: 745)

ایک مجلس کی تین طلاق کا حکم

سوال: کیا فرماتے ہیں مفتیان کرام مسئلہ ذیل کے بارے میں کہ رات میں گیارہ بجے میری سسرال سے فون آیا اس وقت میری بیوی میرے گیارہ مہینے کے لڑکے کو مار رہی تھی ، مجھے سخت غصہ آیا، پہلے سے بھی میں الجھن میں تھا اس لئے موبائل پر میں نے طلاق طلاق طلاق کہا، مجھے یہ یاد نہیں ہے کہ ایک سانس میں کہا تھا یا رک رک کر لیکن اتنا یاد ہے کہ تین مرتبہ کہا تھا، اس طلاق کو بیوی کے علاؤہ کسی نے سنا نہیں ہے، تو طلاق ہوئی یا نہیں، اگر ہوئی تو کتنی ہوئی، کیا بیوی کے دوبارہ نکاح میں آنے کی کوئی شکل ہے؟

نوٹ: دو تین مہینہ پہلے ایک طلاق دیا تھا پھر ساتھ رہنے لگا۔

الجواب باسم الملہم للصدق والصواب: جاننا چاہیے کہ ایک مجلس کہ تین طلاق قرآن وحدیث، اجماع صحابہ، علماء سلف فقہاء ومشائخ اور آئمہ اربعہ یعنی امام ابوحنیفہ ،امام مالک،امام شافعی اور امام احمد بن حنبل رحمہم اللہ کے نزدیک تین طلاق ہوتی ہے اسی طرح غصہ کی حالت میں بھی طلاق واقع ہوجاتی ہے۔ (مستفاد فتاویٰ رحمیہ ج 8 ص 333 کراچی)

لہذا صورت مسئولہ میں جب ایک طلاق پہلے دے چکے تھے تو اب صرف دو طلاق ہی کے مالک تھے اس لئے دو مرتبہ طلاق طلاق کہتے ہی تینوں طلاق پڑ گئی اور بیوی مغلظہ ہوگئی، اب اس کے ساتھ رہنا جائز نہیں سوائے اس کے کہ اس لڑکی کا کسی دوسرے مرد کے ساتھ نکاح ہو اور وہ صحبت بھی کرے پھر اسکا انتقال ہو جائے یا وہ اپنی مرضی سے طلاق دے دے یا تو عدت گزارنے کے بعد آپ سے نئے مہر کے ساتھ دوبار نکاح ہو سکتا ہے۔

نوٹ۔ زوجین جس مسلک سے تعلق رکھتے ہوں ان کے حق میں اسی مسلک کے علماء کا فتویٰ معتبر ہوگا کسی دوسرے مسلک کے عالم کے فتوی کا سہارا لے کر اپنا مطلب حاصل کرنا سخت گناہ ہے۔