Blog

دو بیویوں کے درمیان نفلی عطیات میں بھی برابری ضروری ہے

سوال: کیا فرماتے ہیں درج ذیل مسئلہ میں:

ایک شخص کے پاس دو بیویاں ہیں. ایک بیوی مدرسہ میں پڑھاتی ہے جس سے اس کو تنخواہ ملتی ہے اور وہ اپنی مرضی سے خرچ کرتی ہے جب کہ دوسری بیوی کماتی نہیں ہے۔

شوہر دونوں بیویوں کو نفقہ، کسوہ اور سکنی میں برابری کرتا ہے، مگر شوہر دوسری بیوی (جو کماتی نہیں اور پہلی والی کے مقابلے میں بچے بھی زیادہ ہیں) کو الگ سے کچھ رقم دینا چاہتا ہے تاکہ وہ اپنی زائد ضروریات وخواہشات کو پوری کر لے جیسے موبائل کا خرچہ وغیرہ۔

برائے مہربانی شریعت کے روشنی میں بتائیں کہ کیا شوہر کو واجبی نفقہ کے علاوہ دوسرے نفلی خرچ میں بھی بیویوں کے درمیان برابری کرنا از روئے شریعت واجب ہے؟ کیا واجبی نفقہ میں قیمت کے اعتبار سے برابری واجب ہے یا ضرورت کے اعتبار سے کمی زیادتی ہو سکتی ہے؟

المستفتی: مفتی محمد آصف اعظمی مقیم  حال زامبیا، ممبر پاسبان علم وادب

الجواب باسم الملهم للصدق والصواب:

حضرات حنفیہ کے نزدیک متعدد بیویوں کے مابین حقوقِ واجبہ کے ساتھ نفلی عطیات وتحائف میں بھی  برابری ضروری ہے، اور اگر ان کے بچے بھی ہوں تو باپ کے ذمہ ان کا خرچہ الگ سے ادا کرنا ضروری ہے۔ البتہ اگر کوئی بیوی اپنا مکمل یا کچھ حق معاف کردے تو کوئی حرج نہیں، یا بیوی نافرمان ہو تو شوہر کے ذمہ برابری ضروری نہیں۔

صورت مسئولہ سے معلوم ہوتا ہے کہ بیوی شوہر کی اجازت سے پڑھانے جاتی ہے اگر صورت حال ایسی ہی ہے تو دونوں بیویوں کے درمیان ہدایا وتحائف میں بھی برابری ضروری ہے البتہ شوہر اس بیوی کو پڑھانے سے منع کر سکتا ہے اور اگر وہ نہ مانے تو شوہر کمی زیادتی کرسکتا ہے یا اس شرط پر اجازت دیدے کہ میں دوسری بیوی کو کچھ زیادہ رقم دوں گا، اس طرح کمی زیادتی کرسکتا ہے۔