Blog

(سلسلہ نمبر: 824)

فلیٹ قسط پر خریدنا اور تعمیر مکمل ہونے سے پہلے بیچنا

سوال: حضرت آج ایک مسئلہ کا علم ہوا کہ مال میں ادھار جائز نہیں ، پیسوں میں ادھار کر سکتے ہیں۔

حضرت، احقر نے بھی دو فلیٹ کا قسطوں پر معاملہ کیا۔ ایک فلیٹ کی کُل قیمت چند سالوں تک قسطوں کی شکل میں دینے کے بعد ہم کو تیار ہو کر مل چکا ہے اور اب کرائے پر ہے۔

دوسرا ابھی تیاری کی مرحلے میں ہے اور اس کی آدھی قیمت بکنگ کرواتے وقت دے دی تھی کیونکہ ایسا کرنے سے فلیٹ کی مجموعی قیمت میں رعایت مل رہی تھی۔ باقی نصف قیمت قسطوں کے شکل میں ہر مہینے جاری ہے۔ یہ فلیٹ والدین کے گھر سے قریب ہے۔ اب اس کے قیمت بھی کافی زیادہ ہو گئی ہے لیکن فروخت کر کے جو نفع ہو گا وہ کیا حرام ہو گا۔ کیونکہ بیع فاسد تھی۔

احقر ان دونوں فلیٹوں کا کیا کرے؟ کیا اس معاملے کو صحیح کرنے کی کوئی صورت ہے ؟ کیا فروخت کر دے ؟ فروخت کر کے جو رقم ملے گی ، کیا وہ حلال ہو گی؟

جو فلیٹ کرائے پر ہے، وہ کرائے کی آمدنی کیسی ہے؟

الجواب باسم الملھم للصدق والصواب: آپ نے جس طریقہ سے فلیٹ خریدا تھا اس طریقہ میں کوئی قباحت نہیں ہے اور بیع درست ہے اور رہی بات بیچنے کی تو آپ کا وہ فلیٹ جو تیار شدہ ہے اور آپ کے قبضہ میں بھی ہے اسکا بیچنا جائز ہے اور نفع بھی جائز ہے اور آپ کا وہ فلیٹ جو ابھی بن کر مکمل تیار نہیں ہوا مگر تھوڑا بہت تیار ہوگیا ہے اور آپ کو اسکی حدود اور جگہ معلوم ہے تو اسکی بیع بھی صحیح ہوگی اور نفع آپ کے لئے جائز ہوگا مگر یاد رہے اگر فلیٹ صرف نقشہ میں ہوگا تو اسکو فروخت کرنا جائز نہیں ہوگا۔