Blog

(سلسلہ نمبر: 445)

مشترکہ خاندانی نظام میں ایک بھائی کی خریدی زمین کا حکم

سوال: چھ بھائی ہیں سب ایک میں رہتے ہیں بڑا بھائی اپنی کمائی سے الگ سے زمین لیا ہے کیا سب بھائیوں کا بڑے بھائی کی زمین میں حصہ ہے؟ شریعت کی نظر میں جواب عنایت فرمائیں عین نوازش ہوگی۔

المستفتی: مہتاب اظہر، بہادر گنج، غازی پور۔

الجواب باسم الملھم للصدق والصواب:

 اگر  تمام بھائی ایک ساتھ رہتے ہیں، کوئی کماتا ہے، کوئی گھر کا ذمہ دار ہے، ایسی صورت میں اگر ایک بھائی پیسہ کما کر ذمہ دار بھائی یا باپ کو دیدے پھر وہ اس سے کوئی زمین وغیرہ خریدے تو تمام لوگ اس میں شریک ہوں گے۔

لیکن اگر ایک بھائی اپنی کمائی سے (گھر کے ذمہ دار کو دئیے بغیر) کچھ خود خریدے، یا یہ کہہ کر دے کہ اس پیسہ سے میرے لئے زمین وغیرہ خرید دیں تو تنہا وہ اس کا مالک ہوگا، دوسرے بھائی اس میں شریک نہیں ہوں گے، گرچہ ان کا کھانا پینا اور خرچ وغیرہ ایک ساتھ ہو۔