Blog

بائیں ہاتھ سے ذبح کا حکم

سوال: زید ایک گوشت ایکسپورٹ کمپنی میں بطور ذابح  ملازم ہے، زید  بچپن سے ہی بائیں ہاتھ سے زیادہ کام کرتا ہے، داہنے ہاتھ سے کام کرنے میں الٹا پن محسوس کرتا ہے، اب اپنی عادت کے مطابق کبھی کبھار جانور کو بائیں ہاتھ میں چھری لیکر ذبح کردیتا ہے، تو کیا ذبیحہ میں کوئی کراہت یا قباحت لازم آۓ گی؟ مدلل جواب مرحمت فرما کر ممنون ہوں۔

المستفتی: ظل الرحمن پریتم پور امبیڈکر نگر

الجواب باسم الملہم للصدق والصواب

بلاعذر بائیں ہاتھ سے ذبح کرنا مکروہ تنزیہی ہے البتہ ذبح کیے ہوئے جانور کے گوشت میں اس سے کوئی کراہت نہیں آئے گی، اور اگر عذر ہو تو ذبح کرنا بھی مکروہ نہ ہوگا۔

چونکہ زید کو بائیں ہاتھ سے کام کرنے کی زیادہ عادت ہے اس لئے اس کے ذبیحہ میں کوئی قباحت نہیں ہے۔

نوٹ: مذہبِ اسلام میں ہر اچھا کام دائیں ہاتھ سے کرنا مسنون ومستحب ہے، بلکہ یہ اسلام کی اہم ترین سنت ہے، لہٰذا اگر کسی کے دائیں ہاتھ میں کوئی عذر نہ ہو، تو اُسے چاہیے کہ ہر اچھا کام دائیں ہاتھ سے انجام دینے کی عادت ڈالے، کچھ عرصہ کے بعد جب دائیں ہاتھ کے استعمال کی عادت ہوجائے گی، تو اس سے کام کرنے میں کوئی پریشانی نہیں ہوگی، اور کام بھی اِن شاء اللہ اچھا ہوگا.(مستفاد از: فتاویٰ دار العلوم دیوبند، رقم الفتویٰ: 49369).