Blog

(سلسلہ نمبر: 382)

زندہ جانور وزن سے بیچنا جائز ہے

سوال: آج کل بکرے وغیرہ زندہ وزن کرکے خریدے بیچے جاتے ہیں، کیا اس طرح کی بیع شرعاً فاسد اور ناجائز ہے؟ اگر فاسد ہے تو اگر کوئی اس طرح جانور خرید کر قربانی کرے تو اس کی قربانی درست ہوگی یا نہیں؟ براہ کرم تشفی بخش جواب مرحمت فرمائیں۔

المستفتی: عبد اللہ اعظمی، سنوارہ، اعظم گڑھ۔

الجواب باسم الملھم للصدق والصواب:

 شریعت مطہرہ میں ہر ایسا معاملہ ناجائز ہے جس میں ایسی جہالت ہو جو بعد میں جھگڑے کا سبب بنے، لیکن اگر کسی معاملے میں ایسی معمولی جہالت ہو جس کی طرف لوگ توجہ نہیں دیتے اور نہ ہی وہ جھگڑے کا سبب بنتی ہے تو وہ شرعاً معاف اور معاملہ درست ہے، اس لئے وزن سے زندہ جانور خریدنے میں گرچہ جانور کے سانس اندر باہر کرنے سے کچھ وزن کم زیادہ ہونے کا احتمال ہے لیکن کمی بیشی کے اس احتمال کی وجہ سے جھگڑے کی نوبت نہیں آتی اس لئے زندہ جانور کی وزن سے خرید وفروخت عرف عام اور تعامل ناس ہونے کی وجہ سے شرعاً جائز ہے، اور جب خریدنا جائز ہے تو اس کی قربانی بھی بلا شبہہ جائز ہوگی۔ (دیکھئے فتاویٰ عثمانی: 3/ 98، فتاوی قاسمیہ: 19/ 353، احسن الفتاوی: 6/ 497، فتاوی ریاض العلوم: 5/ 457، 457، ایضاح المسائل: 158).

نوٹ: بعض حضرات کو ہدایہ کی ایک عبارت سے غلط فہمی ہوئی ہے جس کی وجہ سے اس طرح کے معاملہ کو فاسد قرار دیا ہے، لیکن شیخ الاسلام حضرت مولانا ومفتی تقی عثمانی صاحب دامت برکاتہم کے فتاوی موسوم فتاوی عثمانی (3/ 98-101) میں اس پر تفصیلی گفتگو موجود ہے، اہل علم کے لئے اس کا مطالعہ ان شاء اللہ مفید ہوگا ۔