Blog

(سلسلہ نمبر: 814)

اپنی جائیداد کو زندگی میں تقسیم کرنا

سوال: کیا فرماتے ہیں علمائے دین ومفتیان شرع متین مندرجہ ذیل مسئلہ کے بارے میں:

میرے پانچ لڑکے اور ایک لڑکی ہے اور میری زوجہ ہے، سب ایک ساتھ رہتے ہیں مگر اب لڑائی جھگڑا ہونے کی وجہ سے میں سب کو الگ الگ کرنا چاہتا ہوں، میرے تین لڑکوں نے اپنی کمائی سے اپنی اپنی زمین خریدی ہے میں کس طرح تقسیم کروں تاکہ مجھے گناہ نہ ہو. بینواوتوجروا۔

المستفتی: غفران احمد سرائے میر۔

الجواب باسم الملھم للصدق والصواب: ہر شخص اپنی زندگی میں اپنی جائیداد کا خود مالک اور مختار ہوتا ہے، جس میں ہر طرح کا جائز تصرف کر سکتا ہے، اسی طرح والدین کی زندگی میں اولاد کا کوئی حق وحصہ نہیں ہوتا اور نہ ہی کسی کو مطالبہ کا حق حاصل ہوتا ہے؛ تاہم اگر صاحب جائیداد اپنی زندگی میں اپنی مرضی سے اولاد کے درمیان تقسیم کرنا چاہے تو کر سکتا ہے اور اس کو شرعا ہبہ کہتے ہیں۔

ہبہ کا شرعی طریقہ یہ ہے کہ اپنے اور اپنی بیوی کے لیے جتنا رکھنا چاہے رکھ لے تاکہ بوقت ضرورت کام آئے اور بقیہ مال اپنی اولاد کے درمیان برابر برابر تقسیم کر دے یعنی جتنا بیٹے کو دے اتنا ہی بیٹی کو دے۔

البتہ کسی بیٹے یا بیٹی کو اس کی خدمت یا غربت کی وجہ سے کچھ زیادہ دینا چاہے تو اس کی بھی اجازت ہے بشرط کی کسی کو نقصان پہنچانے کا ارادہ نہ ہو لہذا صورت مسئولہ میں آپ اپنے اور اپنی بیوی کے لیے جو رکھنا چاہے رکھ لیں بقیہ بچوں کے درمیان برابر تقسیم کر دیں اور اگر کچھ مالی طور پر پریشان ہوں تو ان کو کچھ زیادہ بھی دے سکتے ہیں اسی طرح بیٹی کو بیٹے کا آدھا دینے کی بھی اجازت ہے۔

آپ کے لڑکوں نے اپنی کمائی سے جو زمین خود خریدی ہے وہ ان کی ہے اس میں دوسرے بھائی بہن کا حق نہیں ہے۔