Blog

(سلسلہ نمبر: 578)

اپنی ولدیت بدلنا جائز نہیں

سوال: کیا فرماتے ہیں مفتی صاحب درج ذیل مسئلہ کے بارے میں کہ :

 زینب کی شادی ماجد سے ہوئی تھی، اس سے اولاد ہوئی پھر زینب اور ماجد کی طلاق ہو گئی، رشتہ ہمیشہ کے لیے ختم ہو گیا، زینب اپنی اولاد لیکر الگ ہوگئی اور زینب نے دوسری شادی کرلی دوسرے شوہر کے ساتھ زندگی گزارتے ہوئے بچے بڑے ہوگئے شادی کے لائق ہوگئے،

اب دریافت یہ کرنا ہے کہ وہ بچے جو پہلے شوہر سے ہیں اور دوسرے شوہر کے پاس اپنی ماں کے ساتھ رہ رہے ہیں انکی ولدیت کیا ہوگی مثلا : سرکاری کاغذات، شادی کارڈ وغیرہ پر ان بچوں کی ولدیت کیا لکھی جائے؟ پہلے شوہر کی یا دوسرے شوہر کی؟ جبکہ زینب پہلے شوہر کا نام سننا بھی پسند نہیں کرتی ہے ۔

از راہ کرم مذکورہ بالا مسئلہ کے سلسلے میں دینی رہنمائی فرما کر عند اللہ ماجور ہوں۔

المستفتی: شفیق عالم کانپور۔

الجواب باسم الملھم للصدق والصواب: اسلام کے شروع زمانے میں لے پالک اور منھ بولے لڑکے کو اپنا بیٹا کہنے کی اجازت تھی لیکن بعد میں اللہ تعالیٰ نے قرآن پاک میں یہ حکم دیا کہ بچوں کو ان کے حقیقی والد کی طرف منسوب کر کے پکارا جائے، اسی طرح احادیثِ مبارکہ میں بھی حقیقی والد کے علاوہ کسی دوسرے شخص کی طرف ولدیت کی نسبت کرنے کی سخت ممانعت آئی ہے؛ اس لئے سرکاری کاغذات وغیرہ ہر جگہ اصلی باپ ہی کا نام لکھنا ضروری ہے، اصلی باپ کے علاوہ دوسرے کے نام کو ولدیت پر لکھنا شرعاً حرام ہے۔