Blog

 (سلسلہ نمبر: 734)

 بطور امانت رکھا زیور ترکہ میں شمار ہوگا

سوال: زید کے چار بیٹے اور دو بیٹیاں ہیں، زید کے پاس کچھ زیورات تھے، زید نے ان زیورات کو پہلے اپنے اور دو بیٹوں کے درمیان رکھا پھر اپنا حصہ ایک تیسرے بیٹے کو دے دیا گویا کہ ان زیورات کو زبانی طور پر مذکورہ تینوں بیٹوں کے نام کردیا اور اس بات کی وصیت کی کہ میرے انتقال کے بعد مذکورہ تینوں بیٹے ان زیورات کے مالک ہوں گے ۔ پھر زید قریب الوفات ان زیورات کو بیچنے کا بار بار تقاضا کرتا رہا لیکن ان زیورات کو فروخت نہیں کیا گیا یہاں تک کہ زید کا انتقال ہوگیا ۔ اور وہ زیورات شروع سے ابھی تک جس بیٹے کی تحویل میں بطور حفاظت و امانت تھے موجود ہیں۔ فقط

صورت مذکورہ میں شریعت کیا حکم دیتی ہے؟  نوٹ: زید کے والدین اور بیوی کا پہلے انتقال ہوچکا ہے۔

المستفتی: محمد فیضان محلہ چندن پورہ کوپاگنج ، مئو۔

الجواب باسم الملہم للصدق والصواب: مذکورہ سوال سے معلوم ہورہا ہے کہ زید نے اپنے کسی بھی لڑکے کو زیور کا مالک نہیں بنایا تھا بلکہ ان کے پاس بطور امانت رکھا تھا اور یہ وصیت کیا تھا کہ میرے مرنے کے بعد تینوں لڑکے لے لیں گے، اس لئے یہ زیور زید کی موت تک اس کی ملکیت تھا، لہذا زید کے انتقال کے بعد یہ زیور اس کے ترکہ میں شمار ہوگا اور چونکہ اگر دیگر  ورثاء راضی نہ ہوں تو وارث کے حق میں وصیت معتبر نہیں ہے اس لئے یہ زیور زید کے تمام ورثہ کے درمیان شرعی طور پر تقسیم ہوگا، یعنی زید کا ترکہ دس حصوں میں تقسیم ہوگا، جس میں سے دو دو حصے چاروں لڑکوں کو اور ایک ایک حصہ دونوں لڑکیوں کو ملے گا۔