Blog

(سلسلہ نمبر: 812)

 بلا عمل کمیشن لینا درست نہیں ہے

سوال: کیا فرماتے ہیں مفتیان عظام مسئلہ ذیل میں:

مسئلہ یہ ہے کہ ایک فیکٹری میں فیکٹری کا ملازم کسی شخص کا کچھ سامان بنوانے کیلئے لاتا ہے اور اس سامان پر ملازم کو کمیشن دیا جاتا ہے، سامان بنوادیا اور معاملہ ختم ہو گیا، پھر کچھ عرصہ کے بعد جس شخص نے سامان بنوایا تھا وہ خود اپنے طور پر فیکٹری دیکھنے اور جائزہ لینے ہے لئے آتا ہے اور فیکٹری میں جو شخص سامان بناتا ہے اسکا امتحان لیتا ہے اور اس کی ڈگریاں دیکھتا ہے اور فیکٹری کی مشینوں سے بھی مطمئن ہوتا ہے اور فیکٹری میں جو سامان بنانے والا شخص کے اس سے متاثر ہوکر وہ دوبارہ سامان فیکٹری میں بنواتا ہے، اور یہ سامان صرف فیکٹری میں سامان بنانے والے کی وجہ سے بنواتا ہے، اگر یہ شخص نہ ہوتا تو وہ شخص اس فیکٹری میں اپنا سامان نہ بنوانا – تو اس صورت میں جو پہلا ملازم آڈر لیکر آیا تھا اُس کو اس دوسرے آڈر میں کمیشن ملیگا یا نہیں؟

المستفتی: جمیل الرحمن حافظ، ریاض۔

الجواب باسم الملھم للصدق والصواب: جاننا چاہئیے کہ اجرت یا متعین کمیشن اس صورت میں ملتا ہے جب کہ اجرت یا کمیشن لینے والے کی طرف سے کوئی عمل پایا جائے، مثلا فیکٹری تک چل کر جانا، ان سے معاملات کو طے کرنا وغیرہ وغیرہ، اگر کوئی عمل نہیں پایا گیا مثلا صرف فیکٹری کا پتہ بتا دیا یا مالک کو عامل کے ایک بار معاملہ کرنے کی وجہ سے خود پتہ معلوم ہوگیا اور مالک اپنے طور پر خود مال تیار کرایا تو عامل کو اس پر کوئی اجرت یا کمیشن نہیں ملے گا، لہذا صورت مسئولہ میں مالک کے ذریعہ دوبارہ تیار کرائے گئے مال پر عامل کو شرعاً کمیشن نہیں ملے گا۔