Blog

 (سلسلہ نمبر: 708)

عدت وفات میں اسقاط حمل

سوال: ایک عورت جن کے شوہر کا گزشتہ جنوری میں انتقال ہوگیا، انکے دو چھوٹے بچے ہیں، ایک بچہ ابھی چھ ماہ کا ہے، اور انھیں گزشتہ ماہ میں پتہ چلا کہ وہ پھر سے حمل سے ہوگئیں ہیں، اس وقت حمل تقریباً ڈیڑھ ماہ کا ہے، جب کہ وہ عدت میں ہیں اور وہ حمل کا اسقاط چاہتیں ہیں، وہ یہ کہہ رہیں ہیں کہ میرے آگے پیچھے کوئی دیکھ بھال کرنے والا نہیں ہے، میں بہت پریشان ہوں اور جو بچہ ابھی چھ ماہ کا ہے وہ آپریشن سے پیدا ہوا ہے۔

دوبارہ بھی ڈاکٹر نے آپریشن ہی بتایا ہے تو میں کیا کروں میں بہت پریشان ہوں، مطلب میں حمل کا اسقاط کرانا چاہتی ہوں، تو میرا ایسا کرانا کیسا ہے؟ اور پھر میری عدت کا کیا ہوگا؟ رہنمائی فرمائیں۔

المستفتی: محمد خالد سلہرا، استاذ حفظ مدرسہ اسلامیہ دار ارقم شیرواں۔

الجواب باسم الملھم للصدق والصواب: حمل ضائع کرنے سے متعلق اصول یہ ہے کہ اگر  حمل  چار  ماہ  سے  کم کا ہو  اور  دین دار وماہر ڈاکٹر  یہ کہہ دے کہ بچہ کی پیدائش کی وجہ سے  ماں کی جان کو یقینی یا غالب گمان کے مطابق خطرہ ہے، یا ماں کی صحت اس حمل کا تحمل نہیں کرپائے گی،  تو ان  جیسے اعذار کی بنا پر  حمل میں روح پڑ جانے سے پہلے پہلے  (جس کی مدت تقریباً چار ماہ ہے)  اسے ساقط کرنے کی گنجائش ہوگی،  چار ماہ کے بعد کسی صورت میں اسقاط حمل جائز نہیں ہے۔

لہذا مذکورہ خاتون ماہر ڈاکٹر سے مشورہ کریں اگر وہ اس حمل کو چھوٹے بچے کی پرورش یا حمل اور ماں میں سے کسی کے لئے خطرہ کا باعث بتائے تو چونکہ ابھی حمل چار ماہ سے کم کا ہے اس لئے اسقاط کی گنجائش ہوگی، اور عدت چار ماہ دس کے بعد ہی پوری ہوگی، یعنی عدت وفات مکمل کرنی ہوگی، اور اگر ڈاکٹر ایسا نہ بتائے تو اسقاط کرانا سخت گناہ ہے، اس سے باز رہنا ضروری ہے۔

نوٹ: دیکھ ریکھ کرنے والے کا نہ ہونا یا آپریشن کے ذریعہ پیدائش ہونا یہ شرعی عذر نہیں ہے؛ اس لئے محض اس وجہ سے اسقاط کی اجازت نہیں ہے۔