Blog

(سلسلہ نمبر: 607)

مروجہ نعتیہ مشاعروں کا حکم

سوال: حضرت ایک مسئلہ درپیش تھا” نعت جو کہ ایک مستحسن عمل ہے، لیکن آجکل عشقیہ مشاعروں کی طرز پر لوگ نعتیہ مشاعرہ کرواتے ہیں اور اس میں بیشتر کاروباری شعراء کو مدعو کرتے ہیں اور وہ خوب چلا چلا کر نعت پڑھتے ہیں ” حضرت مروجہ نعتیہ مشاعرۃ کروانا اور اس میں شرکت کرنا کیسا ہے؟

المستفتی: عبدالماجد شیروانی۔

الجواب باسم الملھم للصدق والصواب: حضور اقدس صلی اللہ علیہ وسلم کی شان میں نعت کہنا، سننا اور اس کے لئے لوگوں کو جمع کرنا (بشرطیکہ شرعی محظورات پر مشتمل نہ ہو) باعث خیر وبرکت اور سعادت دارین ہے، چونکہ یہ ایک دینی کام ہے اس لئے اس میں ایسے شعراء جو دینی امور کا اہتمام نہ کرتے ہوں، یا نعتیہ اشعار کو گانوں کے طرز پر پڑھتے ہوں ان کو نعتیہ مجلسوں میں مدعو کرنا جائز نہیں، نیز مروجہ مشاعرے چونکہ طرح طرح کے مفاسد پر مشتمل ہوتے ہیں مثلا نماز وغیرہ کا کوئی اہتمام نہیں ہوتا، اور اکثر شعراء علم شریعت سے ناواقفیت کی وجہ سے نعت میں ایسے مضامین لکھ جاتے ہیں جو حد شریعت سے متجاوز ہوتے ہیں، جس کی وجہ سے ایسے مشاعرے بسا اوقات مضر اور موجب وبال ہوجاتے ہے، اس لئے ایسے مشاعروں سے پرہیز ضروری ہے ہاں اگر مذکورہ بالا مفاسد نہ پائے جائیں تو پھر کوئی حرج نہیں۔