Blog

گندگی کی وجہ سے پرندوں کے گھونسلوں کو توڑنا

سوال: ہماری دکان کے سامنے برآمدے کے اوپر پرندوں نے گھونسلہ بنا رکھا ہے اور روزانہ ان کی بیٹ اس قدر ہوتی ہے کہ نیچے فرش گندا ہوجاتا ہے، کیا محض اس لئے ان کے گھونسلوں کو نیست ونابود کیا جاسکتا ہے، جبکہ اس میں بچے بھی ہیں؟ بینوا توجروا.

المستفتی : ڈاکٹر محمد یعقوب أعظمی ملیشیا

الجواب باسم الملهم للصدق والصواب:

تعلیمات نبوی میں قدم بقدم جانوروں کے ساتھ رحم وکرم کاحکم دیا گیا ہے، صرف گھریلو اور پالتو جانور ہی نہیں؛ بلکہ غیر پالتو جانوروں کے ساتھ بھی حسن سلوک کی تاکید ہے ، نقصان دہ اور ضرر رساں جانوروں کو بھی کم مار میں مارنے کا حکم ہے؛ حتی کہ حلال جانوروں کو ذبح کرتے وقت تیز چھری کے استعمال کا حکم دیا گیا تاکہ بآسانی اس کی جان نکل سکے، اسی طرح جانوروں کو بے جا تکلیف دینے کے حوالے سے بہت کثرت سے احادیث وارد ہوئی ہیں۔

لیکن انسان کی جان و مال کی اہمیت بھی بہت زیادہ ہے؛ حتی که جان ومال کی حفاظت کے لئے کسی انسان کی جان لینے تک نوبت پہنچ جائے تو حدیث مبارکہ میں اس کی بھی اجازت دی گئی ہے لہذا صورت مسئولہ میں ان پرندوں کے گھونسلوں کو توڑنے کی شرعاً گنجائش ہے بہتر یہ کہ بچے اڑنے کے قابل ہوجائیں تب گھونسلوں کو توڑا جائے اور اس کے بعد ایسی جگہوں پر کیل یا کوئی ایسی کوئی چیز لگا دی جائے تاکہ وہاں دوبارہ گھونسلہ نہ بناسکیں۔