Blog

(سلسلہ نمبر: 767)

دھمکی کے لئے لفظ طلاق استعمال کرنا

سوال: درج ذیل مسئلہ میں شرعی رہنمائی درکار ہے کہ: میں نے اپنے بچوں کے سامنے شرط رکھی تھی کہ اگر میری بیوی میری اجازت کے بغیر گھر کے باہر گئی تو ایک طلاق، مگر کچھ وجوہات کی وجہ سے بغیر اجازت کے گھر چھوڑ کر چلی گئی، جب مجھے میرے بچوں سے معلوم ہوا کہ میری زوجہ گھر چھوڑ کر چلی گئی تو میں نے اپنے بچوں کو گواہ بناکر ایک طلاق دو طلاق تین طلاق دے دی، اور کہا کہ تمھاری ماں کے سامنے بھی بولوں گا۔

گواہ کے بعد والا جملہ میں دھمکی آمیز لہجہ میں مسلسل ایک ساتھ بولا تھا اور میرا یہ بھی خیال تھا کہ طلاق صرف بیوی کے سامنے بولنے سے واقع ہوتی ہے، اس پس منظر میں بتائیں کہ میری زوجہ کو کتنی طلاق پڑی؟ جزاکم اللہ خیرا واحسن الجزاء

المستفتی : یکے از مصلیان مسجد اکبری، اکبر باغ، حیدر آباد۔

الجواب باسم الملہم للصدق والصواب: طلاق کا لفظ دھمکی کے لیے بولا جائے تب بھی طلاق واقع ہو جاتی ہے، اسی طرح طلاق کے لفظ کا بیوی کو سننا بھی ضروری نہیں ہے اس لئے صورت مسئولہ میں تینوں طلاق واقع ہوکر بیوی مغلظہ ہوگئی ہے، اب بلا حلالہ شرعیہ اس سے نکاح درست نہیں ہے۔