Blog

‌ زندگی میں جائداد کی تقسیم

سوال: مکرمی مفتی صاحب! ایک آدمی کو پہلی بیوی سےاولاد تھی، پہلی بیوی کےانتقال کےبعد انھوں نےدوسری شادی کی، اور پہلی بیوی کےبچوں سے باپ نے یہ کہہ دیا کہ میں اب (دوسری شادی کے بعد) جو کماؤں گا یا بناؤں گا وہ دوسری بیوی سے ہونے والی اولاد کا ہوگا، اور پہلی پراپرٹی وکارخانہ سب پہلی اولاد کا ہوگا۔

سوال یہ ہےکہ کیا:

1 –  اس طرح کی تقسیم اورتفریق درست ہے؟

2 –  کیا پہلی بیوی کی اولاد کے وقت جو مال وجائداد تھی اس میں دوسری بیوی کی اولاد کاحصہ بنےگا؟

3 –  اور کیا دوسری بیوی کی اولاد کےوقت جو نئی جائداد بنی ہےاس میں پہلی بیوی کی اولاد کا حصہ بنے گا؟

4 –  دوسری بیوی باحیات ہے اسے کیا ملےگا؟

5 – کیا اسے پہلی بیوی کے وقت موجود جائداد میں بھی حصہ ملے گا؟

امید کہ تشفی بخش جواب سے ممنون فرمائیں گے.

المستفتی: ابوحنظلہ شیرواں

الجواب باسم الملهم للصدق والصواب:

 اگر والد اپنی زندگی میں اولاد کے درمیان مال تقسیم کرنا چاہے تو بہتر یہ ہے کہ تمام اولاد کو برابر حصہ دے خواہ وہ ایک بیوی کی اولاد ہوں یا الگ الگ بیویوں کی، اور بیٹے بیٹیوں کو برابر حصہ دے، بہتر یہی ہے لیکن اگر بیٹوں کو بیٹیوں کا دو گنا دینا چاہے تو اس کی بھی گنجائش ہے۔

اب صورت مسئولہ کا جواب یہ ہے کہ مذکورہ شخص کو دونوں بیویوں کی اولاد میں تفریق نہیں کرنی چاہئے تھی؛ لیکن اگر پہلی بیوی کی اولاد اس شخص کی زندگی ہی میں کارخانے وغیرہ پر قبضہ کرلیا تھا اور دوسری بیوی کی اولاد نے بعد کی جائداد پر اپنے والد کی زندگی ہی میں قبضہ کرلیا تھا تو اب یہ مذکورہ جائداد ان لوگوں کی ملکیت ہوگئی اور یہ وراثت میں تقسیم نہیں ہوگی اور نہ ہی ان چیزوں میں سے ایک دوسرے اور دوسری بیوی کو کچھ ملے گا۔

لیکن اگر والد نے صرف زبان سے کہا تھا اور کسی نے کارخانے وغیرہ پر قبضہ نہیں کیا تھا تو تمام جائداد ترکہ میں شمار ہوگی اور شرعی ضابطہ کے مطابق دونوں بیویوں کی اولاد اور آخری بیوی کے درمیان تقسیم ہوگی، ایسی صورت میں دوسری بیوی کو پہلی بیوی کے وقت کی جائداد سے لیکر اب تک کی تمام موجودہ جائداد کا آٹھواں حصہ ملے گا۔ واللہ اعلم بالصواب۔