Blog

(سلسلہ نمبر: 493)

زکوٰۃ کی رقم کو قرض میں دینا

سوال: کیا کسی صاحب حیثیت کو زکوة کی رکھی ہوئی رقم قرض میں دے سکتے ہیں؟ فی الحال ان کو ضرورت ہے، دو چار روز میں وہ واپس کردیں گے، ان کا تعاون کرنے کے لئے میرے پاس زکوة کی رقم کے علاوہ نہیں ہے۔

المستفتی: محمد انور داؤدی، ایڈیٹر روشنی۔

الجواب باسم الملھم للصدق والصواب: صورت مسئولہ میں زکوٰۃ کی رقم اگر آپ کی اپنی ہے تو قرض میں دے سکتے ہیں، کیوں کہ زکوٰۃ کی رقم صرف الگ کرنے سے متعین نہیں ہوتی بلکہ جب تک مستحق کو مالک نہ بنا دیا جائے اس وقت تک ملکیت سے خارج نہیں ہوتی، اس لئے اس رقم کو قرض میں دے کر یا خود استعمال کرکے اس کی جگہ دوسری رقم کو زکوٰۃ میں دینا جائز ہے۔

لیکن اگر زکوٰۃ کی رقم کسی دوسرے شخص کی ہے جس نے آپ کو مصرف میں خرچ کرنے کے لئے دیا ہے تو اس کو قرض میں دینا یا اپنے استعمال میں لانا جائز نہیں؛ کیونکہ یہ امانت کی رقم ہے اور اس کو مزکی کی اجازت کے بغیر بدلنا جائز نہیں ہے۔

نوٹ: زکوٰۃ کو جلد از جلد مستحقین کے حوالہ کردینا چاہئیے، لیکن اگر کسی خاص مقصد سے کوئی روک کر رکھے تو اس کی بھی اجازت ہے۔