Blog

 (سلسلہ نمبر: 591)

شافعی مقتدی کی رعایت کرنا

سوال: میرا بھائی دبئی میں نماز پڑھاتا ہے، مقتدیوں میں بہت سے شافعی حضرات بھی ہیں، ان کا کہنا ہے کہ فاتحہ کے بعد تھوڑی دیر خاموش رہا کریں تاکہ ہم لوگ بھی فاتحہ پڑھ لیا کریں؟ تو معلوم یہ کرنا تھا کہ حنفی امام کے لئے شافعی مقتدیوں کی رعایت کرنا شرعاً درست ہے یا نہیں؟

المستفتی: عبد الرحیم، منجیرپٹی، اعظم گڑھ۔

الجواب باسم الملھم للصدق والصواب: کسی مقلد کے لئے شرعی حجت کے بغیر محض دوسروں کو خوش کرنے کے لئے اپنے مسلک کو چھوڑ کر دوسرے کے مسلک کی ایسے احکامات پر عمل کرنا درست نہیں جو اس کے مسلک میں ممنوع یا مکروہ ہوں کیونکہ ایسا عمل تلفیق کہلاتا ہے جو بالاجماع باطل ہے۔

حنفی مسلک میں چونکہ فاتحہ کے بعد فورا سورہ پڑھنا واجب ہے، اگر تین مرتبہ سبحان اللہ کہنے کی مقدار سہوا سکوت ہوجائے تو سجدہ سہو واجب ہوجاتا ہے اور اگر جان بوجھ کر سکتہ کیا جائے تو نماز واجب الاعادہ ہوگی، سجدہ سہو سے نماز صحیح نہیں ہوگی، اور امام کی نماز فاسد ہونے کی وجہ سے سارے مقتدیوں کی نماز بھی فاسد ہو جائے گی، اس لئے حنفی امام کے لئے شافعی مقتدیوں کی رعایت میں فاتحہ کے بعد سکتہ کی اجازت نہیں ہے۔

نوٹ: حضرات شوافع کے نزدیک امام کے ساتھ فاتحہ پڑھنے کی اجازت ہے اس لئے وہ امام کے ساتھ فاتحہ پڑھ سکتے ہیں، ان کے لئے الگ سے سکتہ کرنے کی کوئی ضرورت نہیں ہے۔