Blog

(سلسلہ نمبر: 506)

نابالغ  کے نکاح کا حکم

سوال: کیا فرماتے ہیں مفتیان کرام مسئلہ ذیل کے بارے میں زید کی شادی تیرہ سال کی عمر میں ہوئی تھی، اور اسکی بیوی کی رخصتی نہیں ہوئی تھی، زید اب بالغ ہوا ہے اور کہتا ہے کہ میرا نکاح نہیں ہوا اس لئے کہ میں نا بالغ تھا، کیا از روئے شرع زید کی بات درست ہے؟

المستفتی: محمد نعمان، میوات، ہریانہ۔

الجواب باسم الملھم للصدق والصواب: نابالغ لڑکے یا لڑکی کا نکاح اگر اس کے ولی قریب یعنی باپ اوردادا نے کیا ہے تو وہ نکاح صحیح اور لازم ہوجاتا ہے، اور اگر ولی بعید مثلاً چچا، بھائی وغیرہ نے کیا ہے تو نکاح تو صحیح ہوجائے گا لیکن لڑکے اور لڑکی کو خیارِ بلوغ حاصل ہوگا، یعنی اگر وہ اس نکاح کو ختم کرنا چاہیں تو بالغ ہونے کے وقت فوراً اس نکاح کو فسخ کرنے کا اظہار کردیں اور شرعی پنچائت یا دارالقضاء میں جاکر اس کو فسخ کرالیں۔

اس لئے صورت مسئولہ میں زید کا نکاح اگر والد یا دادا نے کرایا ہو تو زید کی بات درست نہیں، اور اگر بھائی یا چچا نے کرایا ہو تو نکاح تو صحیح تھا لیکن بالغ ہونے کے فورا بعد اگر زید چاہے تو اس نکاح کو فسخ کراسکتا ہے۔