Blog

ٹیکسٹ میسج کے ذریعے نکاح كا حكم

مفتی ولی اللہ مجید قاسمی انوار العلوم فتح پور تال نرجا ضلع مئو۔

نکاح کا بہتر اور مسنون طریقہ یہ ہے کہ اس کا اعلان کیا جائے اور اسے مسجد میں منعقد کیا جائے جس میں لڑکی کے سرپرست کی طرف سے ایجاب اور لڑکے کی طرف سے قبول پایا جائے۔ حضرت عائشہ سے روایت ہے کہ رسول اللہ صلیٰ اللہ علیہ وسلم نے فرمایا:

نکاح کا اعلان کرو اور اسے مسجد میں منعقد کرو اور دف بجاؤ۔ (سنن ترمذي: 1089)

حضرت عبداللہ بن زبیر سے منقول ہے کہ نبی صلی اللہ علیہ وسلم نے فرمایا:

 نکاح کا اعلان کیا کرو۔( احمد: 16130)

اور اعلان ہی کے پیش نظر کم سے کم دو گواہوں کی موجودگی ضروری قرار دی گئی ہے جو ایجاب و قبول کے الفاظ کو سنیں۔

ٹیکسٹ میسج اور تحریر کے ذریعے  نکاح کرنا مسنون طریقہ اور احتیاط کے خلاف ہے اس لئے بلاضرورت اسے نہیں اپنانا چاہئے ۔ تاہم اس طرح سے کیا گیا نکاح بھی درست ہے البتہ اس کے صحیح ہونے کے لئے دوشرطوں کا پایا جانا ضروری ہے :

1-میسج یا خط صرف ایک طرف سے ہو اور جس کو اس کے ذریعے نکاح کا پیغام پہونچے وہ دو گواہوں کے سامنے اسے پڑھ کر سنائے تاکہ ایجاب کے الفاظ کو گواہان سن سکیں۔بشرطیکہ اسے یقین ہو کہ تحریر اسی شخص کی طرف سے جسے وہ جانتا پہچانتا ہے ۔اور اس میں کسی طرح کی جعل سازی نہیں کی گئی ہے ۔

2-پھر وہ کہے کہ تم لوگ گواہ رہو میں نے اس پیشکش کو قبول کرلیا ہے ۔

اس طرح سے ایک ہی مجلس میں ایجاب و قبول دونوں پالیا جائے گا جو نکاح صحیح ہونے کے لئے ضروری ہے ۔

اور اگر ان دونوں شرطوں میں سے کوئی شرط نہیں پائی گئی تو نکاح منعقد نہیں ہوگا ۔

لہذا اگر پیغام پر مشتمل تحریر گواہوں کو نہ سنایا جائے اور ان کے سامنے صرف قبولیت کا اظہار کیا جائے تو نکاح درست نہیں ہے ۔کیونکہ ایجاب و قبول کی مجلس ایک نہیں بلکہ الگ الگ ہے ۔[1]

نیز اگر  دونوں طرف سے تحریر ہو اس طرح کہ زبانی قبول کرنے کے بجائے تحریری طور پر قبول کرلیا جاۓ اور دستخط کرکے بھیج دیا جائے تو نکاح صحیح نہیں ہوگا گرچہ گواہوں کے سامنے تحریر لکھی جائے ۔