Blog

قرآن و حدیث کی ان واضح ہدایات کے باوجود اگر ہم اپنے گریبان میں نہ جھانکیں، اپنا جائزہ لیکر اپنی اصلاح نہ کریں، تو کسی کا کیا جائیگا، اپنے ہاتھوں خود ہم اپنا نقصان کرنے والے ہونگے، اپنی آخرت برباد کرنے والے ہونگے، قرآن پاک میں اللہ تبارک و تعالی نے ایسے لوگوں کے متعلق جو اس کی نافرمانی کا ارتکاب کرکے اپنی اخروی زندگی چوپٹ کر لیتے ہیں، ارشاد فرمایا ہے:

یعنی ان نافرمانوں نے اپنے اوپر ظلم کرکے خود اپنا نقصان کیا ہے، اپنے پاؤں پر کلہاڑی ماری ہے، خدائے پاک نے ان کے ساتھ کوئی زیادتی نہیں کی ہے۔

اسلئے ہمیں ہوش کے ناخن لینا چاہئے، اپنا محاسبہ کرنا چاہئے، اگر ہم اس گناہ سے محفوظ ہیں، تو ہم خدا کا شکر بجا لائیں، اور اگر ہم اس گناہ میں ملوث ہیں، تو خدارا جلد اس کو دور کرنے کی تدبیر کریں، توبہ استغفار کریں، اللہ کے واسطے دوسروں پر نظر ڈالنے کے بجائے پہلے اپنا جائزہ لیں۔

 دیکھنا ہی ہے تو تنکا دیکھ اپنی آنکھ کا

دوسروں کی آنکھ کا اے دوست مت شہتیر دیکھ

ايك چغل خور كا قصہ

بہت مناسب معلوم ہوتا ہے ایک واقعہ پر اپنی اس تحریر کو مکمل کروں، جس سے اندازہ ہوگا کہ ایک چغلخور کس حد تک فساد پہیلا سکتا ہے، اور اس کی یہ  قبیح حرکت کتنے خطرناک نتائج  کو جنم دیتی ہے، واقعہ یہ ہیکہ ایک چغلخور دوسروں کے گھروں میں نوکری کیا کرتا تھا، جس گھر میں نوکر رکھ لیا جاتا، دیکھتے ہی دیکھتے اس گھر میں پہوٹ پڑ جاتی، چین و سکون غارت ہو جاتا، آئے دن لڑائی جھگڑا ہونے لگتا، تحقیق کرنے پر پتہ چلتا کہ یہ سب اس چغلخور نوکر کی کارستانی ہے، ایک دن وہ بھی آیا جب اس چغلخور نوکر کے متعلق یہ بات مشہور ہوگئی کہ اس کو گھر میں ملازم رکھنا آفت و مصیبت کو دعوت دینا ہے، دوسرے لفظوں میں آ بیل مجھے مار کا مصداق ہے، چنانچہ یہ نوکر بیکار ہو گیا، کوئی اسے ملازم رکھنے پر تیار نہیں ہوتا تھا، ایک شریف انسان کو اس کی حالت زار پر ترس آ گیا، اس نے اس کو نوکر رکھ لیا، اس بیچارے کو پتہ نہیں تھا کہ وہ چغلخور ہے، چونکہ اس نوکر نے اپنی اس گندی عادت کا خمیازہ بہت اچھی طرح بھگت لیا تھا، اسلئے کچھ دن تو ٹھیک ٹھاک چلا، سب خیریت رہی، لیکن پہر اس کے اندر چغلی کے کیڑے نے کلبلانا شروع کیا، چونکہ لت پڑ چکی تھی جو اتنی آسانی سے نہیں جاتی، اسی وجہ سے فرمایا گیا ہے:

یعنی یہ تو ہو سکتا ہے کہ پہاڑ اپنی جگہ سے ہٹ جائے، لیکن یہ نہیں ہو سکتا کہ آدمی اپنی لت چھوڑ دے، مثل مشہور ہے،

جبل گردد جبلت نہ گردد

اب یہ شخص پہر چغلی کیلئے بے قرار ہوا، چونکہ شریف گھرانے کا ملازم تھا، اسلئے اس کو چغلی والی کوئی بات مل نہیں رہی تھی، چنانچہ اس کے شیطانی دماغ نے ایک کہانی گڑھی، اور اپنی مالکن سے کہا، آپ کے خاوند کا ایک عورت سے ناجائز تعلق ہے، بیچاری بہت فکر مند ہوئی، کہنے لگی اب میں کیا کروں؟ اس نے کہا ایک تدبیر ہے، اگر آپ انکے سر کا تھوڑا سا بال کاٹ کر مجھے دیدیں، تو ایک عامل کی مدد سے میں سب ٹھیک کرا دونگا، بیوی نے پریشان ہو کر کہا، مگر میں بال کاٹونگی کیسے؟ تو اس نے اسے طریقہ بھی سجھا دیا، کہ استرہ تکیہ کے نیچے رکھ لیجئے، اور مالک کے سو جانے کا انتظار کیجئے، جب سو جائیں، کاٹ لیجئے، بیوی آمادہ ہو گئی، اس کے بعد یہ نوکر شوہر کے پاس گیا، اور اس سے کہا آپ جانتے ہیں آپکے گھر سے جانے کے بعد آپ کے گھر کیا ہوتا ہے؟ مالکن کا ایک شخص سے ناجائز تعلق ہے، آپ کے جاتے ہی وہ گھر میں آ جاتا ہے، آج تو میں نے مالکن اور اس شخص کی گفتگو سنی، دونوں آپکے قتل کا منصوبہ بنا چکے ہیں، جس پر آج رات عمل در آمد ہوگا، یقین نہ آئے تو تکیہ ہٹا کے دیکھئیگا، وہاں پلان کے مطابق استرہ رکھا ملیگا، مالک کو بڑا طیش آیا کہ بیوی نے میرے بے پناہ اعتماد کا جو مجھے اس پر تھا گلا ہی گھونٹ دیا، آپے سے باہر ہو گیا، دیکھا تو واقعی استرہ رکھا ہوا تھا، غصہ میں آکر بیوی کا خون کر دیا، سسرال والوں کو پتہ چلا تو انہونے شوہر کو موت کے گھاٹ اتار دیا۔

 اب خود سوچئے کہ ایک چغلخور کیا کیا گل کھلا سکتا ہے؟ حالانکہ بات کچھ بھی نہ تھی لیکن اس نے افسانہ بنا دیا۔

 اس واقعہ سے ہمیں یہ بھی سبق ملتا ہے کہ ہمیں ایسے لوگوں سے جنکی عادت چغلی کی ہو دور رہنا چاہئے، اور اگر وہ کوئی بات ہم تک پہنچانے میں کامیاب ہو جائیں تو ہمیں سنی ان سنی کر دینا چاہئے،اگر ہم نے چغلخور کی بات سنی ان سنی کر دی تو اس کا حوصلہ ٹوٹ جائیگا۔

 اور اسی میں سب کا بھلا ہے، چغلخور کا بھی کہ اس کا حوصلہ ٹوٹیگا، اور اگر تمام لوگ ایسا ہی کرنے لگیں تو ممکن ہے اس کی عادت بھی چھوٹ جائے، اور جس تک بات پہنچائی گئی ہے اور جسکی بات پہنچائے گئی ہے ان سب کا فائدہ ہے کہ تعلقات ختم نہیں ہونگے، اگر وقتی طور پرکوئی بات ہو گئی ہوگی، تو وہ بھی ان شاء اللہ دھیرے دھیرے ختم ہو جائیگی۔

ہمیں یہ بات سمجھ لینی چاہئے کہ ہم سب انسان ہیں، بسا اوقات کوئی ایسی بات ہو جاتی ہے جسکی وجہ سے ہم اپنے انتہائی قریبی لوگوں سے بھی ناراض ہو جاتے ہیں، اورخفگی میں کچھ سخت سست زبان سے نکل جاتا ہے، (جبکہ ایسا ہونا نہیں چاہئے )مگر پہر دھیرے دھیرے معاملہ سلجھ جاتا ہے،اور اگر چغلی سنکر کوئی کاروائی کر دی جائے تو تعلق کی ڈور الجھتی چلی جاتی ہے،ہمیں یہ بھی مان کر چلنا چاہئے کہ جو ہمارے دشمن ہیں، بدخواہ ہیں، وہ ہمارے متعلق اچھی بات تو کر نہیں سکتے، اگر کرینگے تو الٹی سیدھی گفتگو ہی کرینگے، لیکن انکی ان ہفوات سے ہماری ترقی تو رک نہیں جاتی، اسلئے ایسے لوگوں سے کیا بھڑنا اور کیا جھگڑنا؟

 ایک چغلخور نےکسی بزرگ سے چغلی کی کہ آپکو فلاں فلاں ایسا ویسا کہ رہے تھے، انکو بڑا طیش آیا، پہر انہونے خود کو مخاطب کرکے کہا کہ اگر انکی کہی ہوئی باتیں واقعی تمہارے اندر موجود ہیں تو خود کو ان سے پاک کرو، اور اگر نہیں ہیں، تو انہیں بکنے دو، ہم کیوں ان کے متعلق ادھر ادھر کی بکواس کریں خدائے پاک ہم سب کو اس گناہ سے بچنے کی توفیق بخشے، آمین۔