Blog

(سلسلہ نمبر: 499)

چھ ماہ کا حمل ساقط کرانا جائز نہیں

سوال: کیا فرماتے ہیں درج ذیل مسئلے میں:

کہ ایک عورت کو تقریباََ چھ مہینے کا حمل ہے، اب چونکہ ہمارے علاقے میں ڈاکٹرس قبل از ولادت سونو گرافی کرواتے ہیں، اسی کے مطابق حاملہ کی سونو گرافی ہوئى ہے، جسکی رپورٹ میں یہ وضاحت ہوئى ہے بچے کے سر میں پانی آگیا ہے، جسکے سبب اس میں سوجن ہے، ڈاکٹر حضرات کا کہنا ہیکہ ولادت آپریشن سے ہی ہوگی، مگر ولادت کے بعد آثار وتجربات کے پیشِ نظر اس بچہ کا ذہنی اعتبار سے ماؤوف اور جسمانی اعتبار سے معذور ہونے کا قوی امکان ہے، لیکن موجودہ صورتِ حال میں حاملہ کو کسی بھی طرح کی کوئی تکلیف نہیں؛ تو کیا اس عورت کا حمل ما بعد میں پیش آنے والے خطرات کے مد نظر ساقط وختم کیا جاسکتا ہے؟ شریعت سے اسکی کیا گنجائش نکل سکتی ہے، کیا حمل ضائع کرایا جاسکتا ہے؟ اطمینان بخش جواب مرحمت فرمائیں۔

المستفتی: ندیم احمد ، مرکی جونپور۔

الجواب باسم الملھم للصدق والصواب: چار ماہ کے  بعد سخت عذر کے بغیر اسقاط حمل جائز نہیں، چونکہ صورت مسئولہ میں ماں کو کوئی تکلیف نہیں ہے، اور کسی اپاہج یا ماؤوف کی زندگی لینے کا کسی کو شرعاً کوئی حق نہیں ہے، نیز سونو گرافی کوئی حتمی فیصلہ بھی نہیں ہے کہ واقع میں ایسا ہی ہو، اللہ تعالیٰ سے دعا کریں اور صدقہ کا اہتمام بھی کریں، اللہ نے چاہا تو بچہ صحت مند پیدا ہوگا یقیناً اللہ تعالیٰ صحت وطاقت دینے پر قادر ہے۔