Blog

(سلسلہ نمبر: 484)

کسی کی پشت کی طرف قرآن شریف پڑھنا

سوال: معلوم یہ کرنا ہے کہ موبائل میں قرآن شریف کی تلاوت کسی بندے کے پیچھے بیٹھ کر پڑھنا کیسا ہے؟ جیسا کی مسجد میں صفوں میں لوگ بیٹھے رہتے ہیں اور انکے آگے بھی لوگ بیٹھے ہوتے ہیں اور لوگ موبائل میں تلاوت کرتے ہیں؟

المستفتی: ابو حمدان، جری مری، ممبئی۔

الجواب باسم الملھم للصدق والصواب: قرآن یا حدیث میں تو اس طرح پشت کرنے کی ممانعت وارد نہیں ہوئی ہے، اور غالبا فقہاء نے بھی اس کی صراحت نہیں کی ہے، لیکن اتنی بات تو ظاہر ہے کہ قرآن مجید کا احترام واجب اور اس کی بے احترامی گناہ ہے، احترام اور بے احترامی کا تعلق دو باتوں سے ہوتا ہے ،ایک تو دل کے ارادہ سے، دوسرے عرف ورواج سے، عرف ورواج کا مطلب یہ ہے کہ جس بات کو سماج میں بے احترامی سمجھا جاتا ہو وہ بے احترامی متصور ہوگی، اور جس فعل کو عرف میں احترام کے خلاف نہ سمجھا جاتا ہو وہ جائز ہو گا، —– یہ ایک حقیقت ہے کہ مشرقی علاقوں میں کسی چیز کو پشت کے پیچھے رکھنا احترام کے مغائر سمجھا جاتا اور سوئے ادب تصور کیا جاتا ہے، اسی لئے اگر کوئی بڑا آدمی بیٹھا ہو، تو چھوٹا اس کے سامنے اپنی پیٹھ کرکے نہیں بیٹھتا، اس لحاظ سے کوشش یہی کرنی چاہئے کہ قرآن مجید کی طرف پیٹھ کرکے نہ بیٹھاجائے، لیکن اگر جگہ کی تنگی ہو تو اس طرح بیٹھ کر تلاوت کرنے کی گنجائش ہوگی، (کتاب الفتاوی: 1/ 314، آپ کے مسائل اور ان کا حل4/491) ۔