Blog

(سلسلہ نمبر: 681)

امریکہ والوں کی قربانی پہلے دن ہندوستان میں

سوال: کیا فرماتے ہیں مفتیان کرام مندرجہ ذیل مسئلہ میں کہ امریکہ، کناڈا میں مقیم افراد کی قربانی کیا ہم انڈیا میں پہلے دن کر سکتے ہیں؟ کیوں کہ امریکہ انڈیا سے بارہ گھنٹے پیچھے ہے

المستفتی: محمد عرفان حیدرآباد۔

الجواب باسم الملھم للصدق والصواب: اگر ایک ملک کا شخص دوسرے ملک میں اپنی قربانی کا کسی کو وکیل بنائے تو قربانی کے وقت میں تو جانور کی جگہ کا اعتبار ہوگا؛ لیکن جس کی طرف سے قربانی کی جارہی ہے اس کے یہاں دس ذی الحجہ کی صبح صادق کا گزرنا ضروری ہے، اس لئے کہ قربانی کا سببِ وجوب دس ذی الحجہ کی صبح صادق کے وقت قربانی کی استطاعت ہے، اور اس کا تعلق خود آدمی کی ذات سے ہے، اور سببِ وجوب پائے جانے کے بعد یہ قربانی جہاں کی جائے گی وہاں قربانی کا وقت ہونا ضروری ہے، گرچہ جس کی طرف سے قربانی کی جارہی ہے وہاں وقت ختم ہوچکا ہو۔

اس لئے امریکہ کناڈا وغیرہ میں اگر ابھی دس ذی الحجہ کی صبح صادق نہیں ہوئی ہے تو ان کی طرف سے قربانی ہندوستان میں نہیں کی جاسکتی۔