Blog

جماعت ثانیہ کا حکم

سوال: کیا فرماتے ہیں مفتیان کرام مسئلہ ذیل کے بارے میں کہ گزشتہ دنوں میرے گاؤں میں کچھ مہمان آئے اس وقت ظہر کی نماز ہو چکی تھی ان لوگوں نے جماعت ثانیہ ادا کی، کیا ایک مرتبہ جماعت ہو جانے کے بعد جماعت کرنا صحیح ہے یا نہیں؟ اگر نہیں تو کیوں نہیں؟ اگر ہے تو واضح انداز میں بیان کردیں؟

 المستفتی: آفتاب عالم کلکتہ

الجواب باسم الملهم للصدق والصواب

تکرار جماعت مکروہ ہونے کی اصل علت تقلیل  جماعت ہے؛ لہٰذا جن صورتوں میں مسجد کی اصل جماعت کی تقلیل لازم آتی ہو، ان میں تکرار کو مکروہ قرار دیا جائے گا، اور جن صورتوں میں مسجد کی اصل جماعت میں تقلیل لازم نہ آتی ہو، اُن میں تکرار اصولاً مکروہ نہ ہوگا۔

اسی بنیاد پر فقہاء نے غیر اہلِ محلہ کی طرف سے وقت سے پہلےجماعت سے پڑھی گئی جماعت کے بعد مقررہ جماعت کرنے کو مکروہ نہیں کہا ہے۔

اسی طرح ایسی مسجد جہاں امام اور نمازی متعین نہ ہوں، ان میں بھی تکرار جماعت کی اجازت ہے، اسی سے یہ بھی مستفاد ہوتا ہے کہ اگر مسافر لوگ راہ چلتے ہوئے کسی مسجد میں جماعت الگ کرلیں، تو اس میں کوئی کراہت نہیں ہونا چاہئے؛ کیوں کہ مسافروں کے جماعت کرنے سے اصل جماعت پر کوئی اثر نہیں پڑتا۔

لہذا صورت مسئولہ میں مہمانوں کے دوبارہ جماعت کرنے میں کوئی حرج نہیں ہے؛ البتہ بہتر یہ کہ مسجد میں ایک طرف جماعت کریں تاکہ لوگوں کو معلوم ہوسکے کہ یہ جماعت ثانیہ ہے۔ واللہ اعلم بالصواب۔