Blog

حدىث حب الوطن من الإیمان کی تحقیق

سوال: مفتی صاحب ایک سوال کا جواب چاہتا ہوں کیا ایسی کوئى حدیث ہے کہ جس ملک میں رہو اُس ملک سے محبت کرنا ایمان کی علامت ہے؟۔مدلل جواب بتا دیں۔ بڑی مہربانی ہوگی۔

المستفتی: فیصل علی لکھنوی

الجواب باسم الملہم للصدق والصواب:

مسلمان جس ملک میں رہے اس سے محبت اور اس کی حفاظت اس کی اخلاقی ذمہ داری ہے، حضور اکرم صلی اللہ علیہ وسلم جب اپنے وطن مکہ مکرمہ سے ہجرت فرمارہے تھے تو اس وقت مکہ مکرمہ سے اپنی محبت کا اظہار اس طرح فرمایا تھا: کہ تو بہترین شہر ہے اور مجھے تجھ بہت محبت ہے اگر یہاں کے لوگ مجھے نکلنے پر مجبور نہ کرتے تو میں تجھے چھوڑ کر ہرگز نہ جاتا، اسی طرح مسلمانوں نے بھی ہمیشہ اس کا ثبوت بھی پیش کیا ہے کہ جس ملک میں رہے اس کے وفادار شہری بن کر رہے؛ لیکن ناچیز کی معلومات کے مطابق کوئی ایسی حدیث نہیں ہے جس میں ملک سے محبت کو ایمان حصہ فرمایا گیا ہو، کچھ لوگوں نے “حب الوطن من الإیمان” کو حدیث کہہ کر بیان کرتے ہیں اور عوام میں یہ بات مشہور بھی ہے کہ یہ حدیث ہے؛ لیکن محدثین کرام نے فرمایا کہ یہ موضوع اور من گھڑت حدیث ہے اس لئے اس کو حدیث کہہ کر بیان کرنے سے سختی کے ساتھ بچنا چاہئے؛ کیونکہ ایسے لوگوں کے بارے میں حدیث پاک میں جہنم کی وعید آئی ہے، اللہ ہماری حفاظت فرمائے، واللہ أعلم بالصواب۔