Blog

عورت دوران عدت سفر نہیں کرسکتی

سوال:  کیا فرماتے ہیں علماء دین و مفتیان شرع متین مسئلہ ذیل کے بارے میں کہ ایک صاحب کا سعودی عرب میں انتقال ہوگیا ہے (اللہ ان کی مغفرت فرمائے)   اب ان کی بیوی جو کہ عدت میں ہیں ہندوستان سے سعودی عرب آنا چاہتی ہیں کیا شرعاً اس کی اجازت ہے؟ برائے مہربانی مدلل جواب عنایت فرمائیں!

       المستفتی: حافظ ابو بکر اعظمی منجیرپٹی مقیم سعودی عرب

الجواب:  باسم الملهم للصدق والصواب

شوہر کی وفات کے وقت عورت جس گھر میں رہائش پذیر ہو، شدید مجبوری کے بغیر اس گھر سے نکلنا جائز نہیں، البتہ اپنے معاشی انتظام کے لیے عورت دن میں یا رات کے کچھ حصہ میں اپنے گھر سے نکل سکتی ہے، مگر اس کے لیے سفر شرعی کی مقدار (کم از کم 78کلو میٹر ) تک دور جانا جائز نہیں. ( مستفاد بہشتی زیور  واحسن الفتاویٰ : 5/529)۔

حج جو کہ اسلام کا ایک بنیادی رکن ہے اور بڑی مشکلات کے بعد اس کی منظوری ہوتی ہے اگر منظوری کے بعد شوہر کا انتقال ہوجائے تو حج پر نہیں جاسکتی اور اس کے لئےلازم ہے کہ وہ اپنا سفر حج ملتوی کردے اور گھر میں رہ کر عدت گذارے۔

لہٰذا صورت مسئولہ میں اس عورت کا بلا شرعی جواز کے سفر کرنا درست نہیں البتہ اگر بیوی کے گئے بغیر تدفین وغیرہ نہیں ہوسکتی تو جاسکتی ہے لیکن جن کاغذات پر بیوی کی اجازت اور دستخط کی ضرورت ہوتی ہے انھیں عدت میں رہتے ہوئے بھی بھیجا جاسکتا ہے اس لیے شرعاً اس سفر کی اجازت نہیں ہے۔

نوٹ: اگر کسی مجبوری کی وجہ سے جانا ضروری ہے تو پہلے اس کو بیان کرکے حکم شرعی معلوم کرلیں۔

عدت میں پردہ اور علاج کے لئے باہر جانے کا حکم

السلام علیکم ورحمۃاللہ وبرکاتہ

امید کہ مزاج گرامی بخیر ہوگا

سوال: مفتی صاحب ایک مسئلہ یہ دریافت کرنا ہے کہ حالت عدت میں کن کن لوگوں سے پردہ کرنا ضروری ہے، اگر عورت بیمار ہو جائے اور حالت زیادہ بگڑنے کا اندیشہ ہو تو ایسی صورت میں کیا کیا جائے گا،  والسلام

المستفتی:  محمد انظر اعظمی ، قاسمی انسٹی ٹیوٹ سرائے میر اعظم گڑھ.

الجواب باسم الملهم للصدق والصواب

وعليكم السلام ورحمة الله وبركاته

غیر محرم مردوں سے عورتوں کو پردہ کرنا ہرحال میں ضروری ہے، اِس میں عدت کی حالت کا الگ سے کوئی خاص حکم نہیں ہے۔

بیماری کی صورت میں علاج ومعالجه کے لئے ڈاکٹر کو  هي گھر بلایا جائے، اگر طبیعت زیادہ خراب ہو اور کوئی مسلمان دیندار تجربہ کار ڈاکٹر یا حکیم ہسپتال میں داخل کر کے علاج کرانے کا مشورہ دے اور اس کی شدید ضرورت ظاہر کرے تو بقدر ضرورت گھر سے باہر نکلنے اور ہسپتال میں داخل ہو کر علاج کرانے کی گنجائش ہے ،ضرورت سے زیادہ باہر رہنا جائز نہیں ہے. واللہ اعلم بالصواب.