Blog

لیکوریا کا پانی ناپاک ہے

سوال: علماء کرام ومفتیان عظام سے ايك  مسئلہ کے بارے میں تحقیق مطلوب ہے۔ مسئلہ يہ ہے كہ عورت  کے جو سفید پانی آتا ہے تو کیا ناپاک ہوتا ہے یا نہیں؟ وضاحت فرمادیں عین نوازش ہوگی۔

المستفتی: خادم مدرسہ فیضان العلوم۔

الجواب باسم الملھم للصدق والصواب:

مرض یا کمزوری کی وجہ سے نکلنے والا سفید مادہ ناپاک ہے، اس کے نکلنے سے وضو ٹوٹ جاتا ہے اور کپڑے پر لگ جائے تو اسے پاک کرنا ضروری ہوتا ہے، جس عورت کو کبھی کبھی یہ مرض لاحق ہو وہ وضو کرکے نماز پڑھتی رہے اس پر غسل لازم نہیں ہے۔

اور اگر اس مرض کی اتنی کثرت ہوجائے کہ کسی نماز کا پورا وقت اس طرح گزر جائے کہ فرض نماز بھی پڑھنے کا موقع نہ مل پائے تو پھر یہ عورت معذور کے حکم میں ہوجاتی ہے اب اس کے لئے ایک نماز کے پورے وقت میں ایک مرتبہ وضو کافی ہوگا، سفیدی نکلنے سے باربار اسے وضو کرنا نہ پڑے گا۔

اور ایسی معذور عورت کے حق میں یہ سفیدی ناپاک بھی نہ سمجھی جائے گی، اور یہ حکم اس وقت تک باقی رہے گا جب تک کہ ہر نماز میں کم از کم ایک مرتبہ یہ عذر پایا جاتا رہے۔ (فتاویٰ محمودیہ 5/ 223، 224) ڈابھیل، فتاوی عثمانی 1/ 366، کتاب المسائل 1/ 234).