Blog

(سلسلہ نمبر: 655)

ماں کی جان بچانے کے لیے روزہ توڑنا

سوال: زید کی والدہ سرکاری معلمہ ہیں اور حالیہ الیکشن میں انکی ڈیوٹی بیس کلومیٹر دور ایک دیہات میں لگی، جہاں بیٹھنے تک کا بھی بندو بست نہیں تھا اور یہ بیمار بھی تھیں۔

بہر حال یہ ڈیوٹی انجام دینے کے لیے زید کے ساتھ وہاں گئیں اور دوپہر تک وہیں رہیں، دوپہر میں انھوں نے واپسی کا ارادہ کیا تو دھوپ کی شدت سے تھوڑے ہی فاصلے پر جاکر انکو احساس ہوا کہ اگر اس شدت کی دھوپ اور گرمی میں سفر جاری رکھا تو ناگہانی صورت حال پیدا ہوسکتی ہے لہذا چاروناچار واپس پولنگ سینٹر پر گئے، مگر یہ جو تھوڑی دور کا سفر ہوگیا تھا اس سے انکو شدت کی پیاس لگی اور ابھی افطار میں تقریباً پانچ گھنٹے باقی تھے، تو زید نے اپنی والدہ سے کہا کہ آپ روزہ افطار کردیں تو اسکی والدہ نے یہ شرط لگادی کہ اگر تم افطار کروگے تو میں افطار کروں گی، اب زید جو کہ عالم ہے سوچ میں پڑ گیا کہ کیا کرے کیونکہ قیام کا کوئی بندوبست نہ ہونے کی وجہ سے وہ بھی نڈھال ہو چکا تھا، بالآخر اس نے افطار کے وقت میں ابھی زیادہ دیر باقی ہونے کیوجہ سے روزہ افطار کرلیا، اب دریافت طلب امر یہ ہے کہ زید کے اس افطار سے صرف قضا لازم ہوگی یا قضا اور کفارہ دونوں؟

المستفتی: منظر کمال، مئو۔

الجواب باسم الملھم للصدق والصواب: اضطراری حالت میں روزہ توڑنے سے صرف قضا واجب ہوتی ہے کفارہ نہیں، لیکن اضطرار کا تعلق کیا صرف روزہ دار کی اپنی ذات سے ہے یا دوسرے کی وجہ سے بھی اضطرار پایا جاسکتا ہے، تو مسائل شرعیہ میں غور کرنے سےمعلوم ہوتا ہے کہ شریعت نے کئی جگہوں پر دوسرے کی جان بچانے کے لئے اپنا روزہ توڑنے کی اجازت دی ہے، مثلا حاملہ اور مرضعہ عورت اگر بچے کی جان کا خطرہ محسوس کرے تو روزہ توڑنے کی اجازت ہے اور بعد میں صرف قضا کرنی ہوگی، کفارہ نہیں۔

اسی سے استدلال کرتے ہوئے یہ بات سمجھ میں آتی ہے کہ اگر زید کے پاس اپنی ماں کا جان بچانے کے لئے روزہ توڑنے کے علاوہ اور کوئی راستہ نہیں تھا تو روزہ توڑنے کی صورت میں صرف قضا ہی لازم ہوگی کفارہ نہیں۔

نوٹ: چونکہ زید عالم ہے اس لئے اس کی ذمہ داری تھی کہ ماں کو سمجھاتا کہ صرف آپ روزہ توڑیں، مجھے روزہ توڑنا جائز نہیں ہے، اس لئے زید کو توبہ واستغفار بھی کرنا چاہئے۔