Blog

(سلسلہ نمبر: 579)

مسبوق کو امام بنانا

سوال: اگر دوران نماز امام کا وضو ٹوٹ جائے تو کیا مسبوق کو آگے بڑھا سکتا ہے؟ اگر بڑھا دے تو مسبوق کیسے نماز پوری کرے اور  مقتدی کیسے؟.

المستفتی: سفیان مکی، گورکھپور۔

الجواب باسم الملھم للصدق والصواب: مسبوق  شخص کو امامت کے لئے آگے بڑھنے سے گریز کرنا چاہئے، اور خود امام کو بھی چاہئے کہ ایسے شخص کو تکمیل نماز کے لئے اپنا نائب نہ بنائے۔

لیکن اگر مسبوق پہلی صف میں ہو اور اس کو امام آگے بڑھا ہی دے اور مسبوق کو معلوم ہو کہ امام کتنی رکعتیں پڑھا چکا تھا، تو وہ مقتدیوں کے سلام تک نماز پڑھائے ،اور سلام سے پہلے کسی ایسے شخص کو اپنا نائب بنادے جو شروع سے نماز میں شریک ہو ، وہ سلام پھیرے ، اور اس کے ساتھ دوسرے مقتدی بھی سلام پھیردیں اور مسبوق اپنی نماز کو پوری کرلیں۔

اگر مسبوق کو علم نہ ہو کہ امام کی کتنی رکعتیں ہوئی تھیں؟ تو یہ مسبوق ایک رکعت نماز پوری کرکے تشہد کی مقدار بیٹھا رہے، پھر کھڑا ہو، اور اپنی نماز اس طرح پوری کرے کہ ہر رکعت میں احتیاطا قعدہ کرلے، یہ امام جب مقدار تشہد بیٹھ کر اٹھے، تو مقتدی اس کی اقتداء نہ کریں ، بلکہ اس کے فارغ ہونے کا انتظار کریں ، امام کے فارغ ہونے کے بعد یہ تنہا تنہا اپنی بقیہ نماز پوری کرلیں۔

اگر امام نے کسی ایسے شخص کو خلیفہ بنایا جو پچھلی صف میں تھا اور اس نے فوراً امامت کی نیت کرلی تو اس سے آگے کے لوگوں کی نماز فاسد ہوجائے گی اور اگر اس نے محراب میں جاکر نیت کی تو نماز کے صحیح ہونے کے لیے ضروری ہے کہ امام اس وقت تک مسجد سے نہ نکلا ہو اگر امام مسجد سے نکل گیا ہو تو سب کی نماز فاسد ہوجائے گی۔

نوٹ: بنا کے جواز کے لیے علماء نے تیرہ شرطیں لکھی ہیں جن کی رعایت ہر شخص سے دشوار ہے ؛اس لیے استیناف (ازسرِ نو نمازپڑھنا) بہرحال بہتر ہے۔