منگنی ٹوٹنے کے بعد سامان کی واپسی

(سلسلہ نمبر: 505)

منگنی ٹوٹنے کے بعد سامان کی واپسی

سوال: مفتی صاحب ایک لڑکے کی ایک جگہ منگنی ہوئی، اس کے گھر والوں نے لڑکی کو ایک قیمتی انگوٹھی اور کچھ پیسے دیئے، اسی طرح تقریبا تین ہزار روپئے کی مٹھائیاں اور پھل بھی دئیے تھے، اسی طرح لڑکی والوں نے بھی کچھ ہدیہ تحفہ دیا تھا؛ لیکن کسی وجہ سے اب یہ منگنی ٹوٹ گئی ہے، کیا یہ سب چیزیں واپس کرنی ہوں گی؟ برائے کرم شریعت کا حکم بتا کر ممنون فرمائیں۔

المستفتی: محمد فیصل، منجیرپٹی، اعظم گڑھ۔

الجواب باسم الملھم للصدق والصواب: جو چیز کسی کو تحفہ اور ہدیہ میں دی جائے اسے واپس نہیں لینا چاہئیے، لیکن منگنی کے وقت جو چیزیں دی جاتی ہیں ان کا مقصد رشتہ کی مضبوطی ہوتی ہے جو کہ اب فوت ہوچکی ہے اس لئے منگنی سے پہلے یا بعد میں جو اشیاء جانبین سے ایک دوسرے کو بطور تحفہ دی گئی تھیں اب منگنی ٹوٹ جانے کے بعد وہ اشیاء اگر موجود ہیں تو جانبین کی رضامندی سے ایک دوسرے سے واپس لی جاسکتی ہیں، ہاں اگر وہ اشیاء ٹوٹ پھوٹ کر ضائع ہوگئیں ہیں یا کھانے والی چیزوں کو کھالیا گیا ہے تو ان کے بدلہ میں دوسری چیز نہیں لی جاسکتی۔

اگر صرف ایک طرف سے کچھ دیا گیا تھا اور اسے دوسرا فریق لوٹانے کے لئے تیار نہیں ہے تو شرعی پنچایت کے ذریعہ فیصلہ کراکر وصول کیا جاتا سکتا ہے. (مستفاد فتاویٰ قاسمیہ: 12/ 536) ۔

الدلائل

تزوج امرأة وبعث إليها هدايا وعوضت المرأة على ذلك عوضا ثم زفت إليه ثم فارقها وقال إنما بعثت إليك عارية وأراد أن يسترد ذلك وأرادت المرأة أن تسترد العوض فالقول له في الحكم وإذا استرد ذلك من المرأة كان للمرأة أن تسترد منه ما عوضته عليه كذا في المحيط. (الفتاوى الهندية: 1/ 323).

( خطب بنت رجل وبعث إليها أشياء ولم يزوجها أبوها فما بعث للمهر يسترد عينه قائما ) فقط وإن تغير بالاستعمال ( أو قيمته هالكا ) لأنه معاوضة ولم تتم فجاز الاسترداد ( وكذا ) يسترد ( ما بعث هدية وهو قائم دون الهالك والمستهلك ) لأنه في معنى الهبة. (الدر المختار).

قوله (لأنه في معنى الهبة) أي والهلاك والاستهلاك مانع من الرجوع بها وعبارة البزازية لأنه هبة اھ. ومقتضاه أنه يشترط في استرداد القائم القضاء أو الرضا وكذا يشترط عدم ما يمنع من الرجوع. (رد المحتار: 3/ 153).

لا ینفرد الواهب بالرجوع بل یحتاج فیه إلی القضاء، أو الرضاء، أو قبل التسلیم ینفرد الواهب بذلک، هکذا في الذخیرۃ. (الفتاوى الهندية: 4/ 409).

والله أعلم.

حرره العبد محمد شاکر نثار المدني القاسمي غفرله أستاذ الحديث والفقه بالمدرسة الإسلامية العربية بيت العلوم سرائمير أعظم جره الهند.

30 – 2- 1442ھ 18- 10- 2020م الأحد

المصدر: آن لائن إسلام.