Blog

(سلسلہ نمبر: 485)

نکاح کے وقت لڑکی کا نام غلط ہو جائے

سوال: اگر نکاح میں لڑکی کا نام بدل جائے تو نکاح منعقد ہوگا یا نہیں؟ جیسے زید کا نکاح سازیہ سے ہونا طے تھا لیکن قاضی نکاح نے نکاح نامہ میں سازیہ کے بجائے راضیہ لکھ دیا اور اسی نام سے ایجاب کیا اور لڑکے نے قبول کیا، ایجاب وقبول راضیہ نام پر اس لئے ہوگیا کہ اس وقت کوئی اعتراض کسی کی طرف سے نہیں ہوا کیونکہ ان لوگوں نے سمجھا کہ اس لڑکی کا نام راضیہ ہی ہے جس سے نکاح ہونا طے پایا ہے، باقی اور کسی کے نام میں کوئی غلطی نہیں ہوئی ہے، نکاح ہوئے مہینہ گزرچکا ہے، نیز راضیہ لڑکی کی بہن کا بھی نام نہیں ہے، اب اس صورت میں نکاح منعقد ہوگا یا نہیں؟ مدلل جواب عنایت فرمائیں مہربانی ہوگی۔

المستفتی: ابو سلمان، ممبر مجلس مشاورت۔

الجواب باسم الملھم للصدق والصواب: نکاح کی مجلس نکاح میں اگر لڑکی موجود تھی تو نام غلط ہونے کی باوجود اس کا نکاح صحیح ہوچکا ہے اور اگر نکاح کی مجلس میں لڑکی موجود نہیں تھی اور نکاح خواں نے رسید پر غلط لکھنے کے ساتھ ساتھ اپنی زبان سے بھی غلط نام لے کر کے نکاح پڑھایا ہے تو ایسی صورت نکاح منعقد نہیں ہوا؛ اس لئے کہ اس شکل میں لڑکی متعین نہیں ہوئی، حالانکہ نکاح کے اندر لڑکی کا متعین ہونا لازم ہوتا ہے۔

چونکہ لڑکی لڑکا نکاح درست سمجھ کر ایک ساتھ رہ چکے ہیں اس لئے مہر دینا ضروری ہوگا، آگے اگر دونوں ساتھ رہنا چاہتے ہیں تو نئے مہر کے ساتھ دوبارہ نکاح کرنا ہوگا۔

نوٹ: اس دوران اگر عورت کو حمل ٹھہر گیا ہو تو پیدا ہونے والے بچہ کا نسب ثابت ہوگا۔