Blog

ٹرین میں راستہ میں نماز پڑھنا

سوال: کیا فرماتے ہیں علمائے دین ومفتیان شرع متین مسئلہ ذیل کے بارے میں کہ بعض حضرات دوران سفر میں لوگوں کے راستہ میں پڑھتے ہیں، ایک صاحب نے اعتراض کیا کہ بندوں کو پریشان کرکے اللہ کی عبادت کرنا یہ کون سا دین ہے، ان کا کہنا ہے اگر نماز کے لئے مناسب جگہ نہ ملے تو نماز کو قضا تو کردیں مگر راستے میں پڑھ کر لوگوں کو پریشان نہ کریں کیونکہ حقوق العباد اور حقوق اللہ میں حقوق العباد کی اہمیت زیادہ ہے۔

سوال یہ ہے کہ کیا مذکورہ شخص یہ بات درست ہے؟ امید ہے کہ تشفی بخش جواب مرحمت فرمائیں گے۔

المستفتی:  بندہ خدا۔

الجواب باسم الملھم للصدق والصواب:

نماز کی شریعت اسلامیہ میں بڑی اہمیت ہے اور اسے وقت پر ادا کرنے کی بڑی تاکید ہے، اس لئے دوران سفر بھی نماز قضا نہیں کرنی چاہئے۔

 ٹرین سے سفر کے دوران اگر ٹرین میں نماز پڑھنے کے لئے مناسب جگہ نہ ملے اور نماز کے پڑھنے کے بقدر ٹرین کسی اسٹیشن پر نہ رکے یا اترنے میں پریشانی ہو تو ٹرین ہی میں نماز پڑھ لیں، بعض ڈبوں کے کنارے کافی جگہ خالی ہوتی ہے وہاں نماز پڑھ لیں لیکن اگر جگہ نہ ہو تو مجبوری کی صورت میں ٹرین کے ڈبہ میں گذر گاہ میں نماز پڑھنے میں کوئی حرج نہیں ؛ اس لئے کہ دو چار منٹ لوگوں کی آمد ورفت بند ہونے سے مسافروں کو کوئی خاص زحمت نہیں ہوتی؛ بلکہ اکثر غیر مسلمین بھی ایسی صورت بخوشی رک جاتے ہیں، نیز ٹرین کے ہر ڈبہ میں دونوں طرف ضرورت کی جگہیں بنی رہتی ہیں اگر ایک طرف کا راستہ بند ہو تو دوسری طرف آدمی جاسکتا ہے، تاہم دیر تک راستہ نہ روکے رکھیں کیونکہ اس میں دوسرے ڈبوں تک جانے والوں کو دشواری ہو سکتی ہے۔

اس لئے مذکورہ شخص کی بات بے محل ہے۔حقوق العباد کا حوالہ دیکر نماز نہ پڑھنے کا عذر پیش کررہا ہے، حالانکہ دوران سفر دیکھا گیا ہے کہ نمازی لوگ دوسروں کے حقوق کا اوروں کی بنسبت زیادہ خیال رکھتے ہیں۔