Blog

ترجمہ اور تفسير سورہ طارق

مرتب: محمد ہاشم قاسمى بستوى، استاذ جامعہ اسلاميہ مظفر پور اعظم گڑھ يوپى انڈيا

شروع اللہ کے نام سے جو بڑا مہربان، نہایت رحم والا ہے

قسم ہے آسمان اور رات کو ظاہر ہونے والی کی۔

اور آپ کو کچھ معلوم ہے کہ وہ رات کو ظاہر ہونے والا کیا ہے؟

وہ روشن تارا ہے۔

کوئی جان ایسی نہیں کہ جس پر نگہبان مقرر نہ ہو۔

سو انسان کو دیکھنا چاہیے کہ وہ کس چیز سے پیدا کیا گیا ہے،

وہ ایک اچھلتے پانی سے پیدا کیا گیا ہے۔

جو پیٹھ اور سینے کی ہڈیوں کے درمیان سے نکلتا ہے۔

یقینا وہ اس کے دوبارہ زندہ کرنے پر قادر ہے۔

جس روز کہ تمام بھید آشکار ہوں گے اور ان کی جانچ پڑتال ہوگی۔

اس دن انسان کے پاس نہ خود اپنا کوئی زور ہوگا اور نہ کوئی مدد کرنے والا ہوگا۔

قسم ہے بارش برسانے والے آسمان کی۔

اور (نباتات اگتے وقت) پھٹ جانے والی زمین کی۔

بیشک یہ قرآن ایک قول فیصل ہے تمام اختلافات و اعمال کے لیے۔

وہ کوئی بےمعنی اور فضول بات نہیں۔

یہ لوگ کچھ چالیں چل رہے ہیں۔

اور میں بھی ایک چال چل رہا ہوں۔

پس منکروں کو مہلت لینے دو ، زیادہ نہیں، تھوڑی سی۔

تعارف سورة الطارق

اس سورت میں ایک رکوع اور 17 آیات ہیں۔ اس کا نمبر 86 ہے۔ یہ سورت مکی دور کے ابتدائی زمانہ میں نازل ہوئی جب کہ اہل مکہ ہر صورت حق کو مٹانے اور باطل کو فروغ دینے کی کوشش میں لگے ہوئے تھے اور یہ صاف صاف اللہ کے خلاف لڑائی تھی اور وہ اس بات کو جانتے ہی نہ تھے کہ یہ جنگ جیت لینا نہ صرف مشکل ہی ہے بلکہ ناممکن بھی تھی۔ اس سورت میں یہی دو موضوع زیر بحث آئے ہیں۔ ایک تو اللہ کی قدرت کے ثبوت اور دوسرے قرآن پاک کی جامعیت اور سچائی۔ جن کو رات تارے اور انسان کی پیدائش کے واضح ثبوت سے مزید روشن کردیا گیا ہے۔ اور آخرت کو سچ اور اٹل ثابت کیا گیا ہے۔ آخر میں پر زور الفاظ میں یہ حقیقت بتا دی گئی ہے کہ یہ لاکھ کوشش کریں حق مٹ نہیں سکتا بلکہ یہ خود اپنی آنکھوں سے دیکھ لیں گے کہ ان کی تمام چالیں کیسے مل یا میٹ ہوجائیں گے اور قرآن غالب و کامران ہوجائے گا۔ انشاء اللہ قرآن کی روشنی اسلام کا نور پوری دنیا کو منور کرکے رہے گا۔

تشريح

والطارق: طارق عربی لغت میں اس مہمان کو کہتے ہیں جو رات کے وقت آئے اسی طرح رات کے وقت پیش آنے والے واقعہ کو بھی طارق کہہ دیتے ہیں اس لیے حدیث میں آیا ہے: نعوذ باللہ من طوارق اللیل. ہم اللہ تعالیٰ سے رات کو اچانک پیش آنے والے شر سے پناہ مانگتے ہیں، کیونکہ ایسے پیش آنے والے شر سے بچنا مشکل ہے، عرب شعرانے اپنے اشعار میں معشوق کے خیال کو طارق سے تعبیر کیا ہے کیونکہ معشوق کا خیال بھی بار بار آجاتا ہے اور فراغت کے وقت زیادہ آتا ہے اور خاص طور پر رات کو فراغت زیادہ ملتی ہے اس لیے معشوق کا خیال بھی رات کو زیادہ آتا ہے اس لیے اس کو انھوں نے طارق کہا ہے۔ ( تفسیر عزیزی)

﴿إِنْ كُلُّ نَفْسٍ لَمَّا عَلَيْهَا حَافِظٌ﴾:  علامہ آلوسی (رح) لکھتے ہیں کہ اس آیت میں ” إن نافیہ ہے اور لما” إلا “ کے معنی میں ہے: نہیں ہے کوئی نفس مگر اس پر نگران ہے، مطلب یہ ہے کہ اللہ تعالیٰ کی طرف سے ایک فرشتہ مقرر ہے جو اس کی ہر مصیبت سے حفاظت کرتا ہے۔ یا مطلب یہ ہے کہ کوئی شخص ایسا نہیں ہے کہ جس پر کوئی اعمال کا یاد رکھنے والا فرشتہ مقرر نہ ہو کہ اس کے اعمال کا محاسبہ نہ ہو بلکہ ہوگا، اور اس قسم کو مقصود سے مناسبت یہ ہے کہ جیسے آسمان پر ستارے ہر وقت محفوظ رہتے ہیں مگر ان کا ظہور رات کے وقت ہوتا ہے، اسی طرح اعمال نامہ ہر ایک شخص کا محفوظ ہے، مگر اس کا ظہور خاص وقت قیامت کے دن ہوگا لہٰذا اس قیامت کی فکر کرنی چاہئے۔

﴿إِنَّهُ عَلَىٰ رَجْعِهِ لَقَادِرٌ﴾:  اللہ تعالیٰ انسان کو دوبارہ لوٹانے ( یعنی پیدا کرنے) پر قادر ہیں اس سے استبعاد قیامت کا شبہ بھی دور ہوا کہ جو نطفہ سے پیدا کرسکتا ہے وہ دوبارہ بھی پیدا کرسکتا ہے۔ ( روح المعانی ص ٤٣٣ ج ٣٠)، علامہ قرطبی (رح) فرماتے ہیں یہ قول اقویٰ ہے ( قرطبی ص ١٠ ج ٢٠)

﴿اِنَّهٗ لَقَوْلٌ فَصْلٌ﴾:  إنه کی ضمیر کے بارے میں دو قول ہیں: 1 – قرآن یعنی قرآن کریم حق وباطل کے درمیان فیصلہ کرنے والا ہے۔ ( روح المعانی : ص ٤٣٦ ج ٣٠ قرطبی ص ١٣ ج ٢٠)

2-  ضمیر راجع ہے ” انہ علی رجعہ لقادر “ کی طرف معنی ہوگا لوٹانے کی بات فیصلہ کی بات ہے۔ ( قرطبی : ص ١٣: ج ٢٠)

﴿فَمَــهِّلِ الْكٰفِرِيْنَ اَمْهِلْهُمْ رُوَيْدًا﴾: اسلام کے ابتدائی دور سے آج تک کفار موجود ہیں ان کو مہلت دینے کی حکمت یہ ہے کہ یہ لوگ اسلام کے بارے میں شبہات پیدا کرنے کی کوشش کرتے رہیں گے، جس کے جواب میں اسلام کی حقانیت اور صداقت کے دلائل اور براہین پیش کئے جائیں گے، جو اسلام کی واضح حقانیت اور ترقی کا باعث ہوں گے، اگر اللہ تعالیٰ چاہتا تو فوراً ہلاک کردیتا مگر ہلاک نہیں کیا ۔ واللہ اعلم ۔

فائدہ :۔ حضرت تھانوی (رح) لکھتے ہیں کہ اخیر کی قسم کے مضمون سے یہ مناسبت ہے کہ قرآن آسمان سے آتا ہے اور جس میں قابلیت ہوتی ہے اس کو مالا مال کرتا ہے جیسے بارش آسمان سے آتی ہے اور عمدہ زمین کو فیض یاب کرتی ہے۔