Blog

(سلسلہ نمبر: 731)

تراویح میں قرآن کریم جلدی جلدی پڑھنا

سوال: کیا فرماتے ہیں علمائے دین شرع متین مسئلہ ذیل کے بارے میں کہ رمضان المبارک کے ایام میں ہمارے یہاں نماز تراویح میں امام صاحب قرآن کریم اس طرح پڑھتے ہیں کہ مقتدیوں کو کچھ سمجھ نہیں آتا، کیا ورتل القرآن ترتیلا فرض نہیں ہے؟ براہ کرم جواب سے نوازیں۔

المستفتی: ڈاکٹر محمد یاسین، اسارہ، باغپت۔

الجواب باسم الملہم للصدق والصواب: قرآن کریم کو ترتیل اور تجوید کے قواعد کی رعایت کے ساتھ پڑھنا ضروری ہے، نبی کریم صلی اللہ علیہ وسلم نے فرمایا کہ قرآن کو ترتیل کے ساتھ صاف صاف پڑھو، تم میں کسی کا مقصد صرف سورہ ختم کرنا نہ ہو، یعنی سورت ختم کرنے یا زیادہ قرآن پڑھنے کی فکر میں ترتیل وتجوید کی خلاف ورزی درست نہیں ہے؛ اس تراویح یا کسی بھی نماز میں قرآنِ مجید کو اس قدر تیز پڑھنا کہ الفاظ وحروف کی ادائیگی مکمل نہ ہو، یا تیز رفتاری کی وجہ سے سامعین کو سمجھ میں نہ آتا ہو، شرعاً درست نہیں، اس طرح قرآنِ مجید پڑھنا ثواب کے بجائے گناہ کا باعث ہے۔