Blog

 نماز کسوف کا طریقہ

سوال: نماز کسوف کا پڑھنے کا طریقہ کیا ھے؟ مدلل جواب سے نوازیں۔

المستفتی: محمد اسجد قاسمی۔

 الجواب باسم الملھم للصدق والصواب:

نماز کسوف (سورج گرہن) کا طریقہ بھی وہی ہے جو عام نوافل کا ہے، اور اس نماز کے لیے اذان اور اقامت نہیں ہے، یہ نماز تنہا اور جماعت دونوں طرح سے پڑھی جاسکتی ہے، اگر لوگوں کو جماعت کے ساتھ نماز پڑھنے کے لیے جمع کرنا مقصود ہو تو اعلان کردیا جائے،  نیز اس نماز میں سورۂ بقرہ یا اس جیسی بڑی سورتیں پڑھنا یعنی طویل قراءت  اور  لمبے لمبے رکوع اور سجدے کرنا مسنون ہے، اور اس نماز میں امام ابو حنیفہ رحمة اللہ علیہ کے نزدیک قراءت آہستہ آواز سے کی جائے گی،  اور امام ابو یوسف رحمة اللہ علیہ کے نزدیک جہر یعنی آواز کے ساتھ، اور امام محمد رحمة اللہ علیہ سے دونوں قسم کا قول منقول ہے، چونکہ اس نماز میں قیام طویل ہوتا اور سری نماز مقتدیوں پر بھاری ہوسکتی ہے اس لئے جہرا قرات کرنے میں کوئی حرج نہیں ہے امام طحاوی رحمة اللہ علیہ نے اسی کو اختیار کیا ہے۔

نماز کے بعد امام دعا میں مصروف ہوجائے، اور سب مقتدی آمین آمین کہیں،  یہاں تک سورج  گرہن ختم ہوجائے۔

نوٹ:  اگر ایسی حالت میں سورج غروب ہوجائے یا  یا کسی نماز کا وقت ہوجائے تو دعا ختم کرکے وقتی فرض نماز میں مشغول ہوجانا چاہیے۔اسی طرح مکروہ اوقات میں سورج گرہن ہوجائے تو یہ نماز نہیں پڑھی جائے گی، بلکہ صرف دعا کرلی جائے. واللہ اعلم بالصواب۔