Blog

(سلسلہ نمبر: 387)

زنا کے حمل کا حکم

سوال: ایک مسئلہ دریافت کرنا تھا برائے کرم جواب عنایت فرمائیں پوری نوعیت مسئلہ لکھتا ہوں:

ہوا یوں کہ ایک بچی کی شادی ہوئی پندرہ دن کا عرصہ ہوا اس بچی کے غلط مراسم کسی اور لڑکے سے تھے جسکی وجہ سے اس بچی کو ایک ماہ سات دن کا حمل ہے، اس کے شوہر نے اسے طلاق دیدی، اب وہ لڑکا جس سے اسکے غلط تعلقات تھے اسی سے شادی کرائی جارہی ہے چونکہ اس بچی کو حمل ہے بغیر وضع حمل کے شادی نہیں ہو سکتی،

کیا ایسی صورت میں اسقاط حمل کی کوئی  گنجائش نکل سکتی ہے؟ اگر اسقاط نہیں ہوگا تو کیا وہ زانی جو ناکح بن رہا ہے بعد وضع حمل اس بچہ کا باپ ہوگا؟ یا وہ بچہ حرامی ہوگا اس زانی سے اس کا نسب ثابت نہیں ہوگا؟ خلاصہ یہ ہے:

(1)اسقاط حمل کی گنجائش ہے؟

(2) وضع حمل کی لمبی مدت عذر ھو سکتی ہے؟

(3) زانی  سے اس بچہ کا نسب ثابت ہوگا؟

(4) زنا کی وجہ سے جو حمل ٹھہرا وہ حرامی ہے؟

المستفتی: محمد مسیح الزماں، ممبر ترجمان ملک وملت۔

الجواب باسم الملھم للصدق والصواب:

 زنا شریعت اسلامیہ میں انتہائی گندہ اور بدترین جرم ہے، اس پر سچے دل سے توبہ اور استغفار لازم وضروری ہے. سوالات بالا کے ترتیب وار جواب ملاحظہ فرمائیں.

 (1) صورت مسئولہ میں چونکہ شوہر نے طلاق دیدیا ہے اور آئندہ زانی ہی سے نکاح کا ارادہ ہے اس لئے یہ بظاہر اس حمل کے اسقاط کی گنجائش نہیں معلوم ہوتی، لیکن اگر زانی اس پیدا ہونے والے بچے کی پرورش کے لئے تیار نہ ہو یا وہ حمل نکاح کے لئے مانع بنے تو چونکہ ابھی چار ماہ سے کم ہے اس لئے ایسی مجبوری میں اسقاط حمل کی گنجائش ہو سکتی ہے۔

(2) البتہ عدت کی مدت کا لمبا ہونا یہ اسقاط کے لئے عذر نہیں ہے۔

(3) زانی سے اس بچہ کا نسب بھی ثابت نہیں ہوگا اس لئے کہ پیدائش کے وقت زانی کے نکاح میں نہیں ہوگی۔

(4) جی یہ ثابت النسب نہیں ہوگا، صرف ماں کی طرف اس کی نسبت ہوگی۔

نوٹ: اگر اسقاط نہیں کراتے ہیں تو عدت بچہ پیدا ہونے کے بعد ہی پوری ہوگی، گرچہ یہ ناجائز حمل ہے، اور اگر اسقاط کرالیتے ہیں تو چونکہ ابھی حمل کم  مدت کا ہے اس لئے یہ اسقاط عدت مکمل ہونے کا سبب نہیں بنے گا بلکہ الگ سے تین حیض تک عدت گزارنا ضروری ہوگا۔