Blog

(سلسلہ نمبر: 543)

نکاحانہ کی شرعی حیثیت

سوال: کیا فرماتے ہیں مفتیان کرام مسئلہ ذیل کے بارے میں: قاضی کا نکاح پڑھا کر اجرت لینا کیسا ہے؟ یہ اجرت لڑکی والوں سے لینگے یا لڑکے والوں سے؟ عموماً لڑکی والے بلاتے ہیں اور اجرت لڑکے والوں سے وصول کی جاتی ہے، کیا ایسا کرنا درست ہے؟ اگر ہم نکاحانہ کو اجرت کہتے ہیں تو اجرت جانبین سے طے ہونی چاہیے  ایسا ہوتا نہیں، کیا مجہول اجرت درست ہے؟  قرآن وحدیث کی روشنی میں جواب مرحمت فرماکر ثواب دارین حاصل کریں۔

المستفتی: عبدالحمید قاسمی چماواں پھول پور۔

الجواب باسم الملھم للصدق والصواب: نکاح پڑھا کر اجرت لینا شرعاً درست ہے، لیکن ہمارے عرف میں نکاح کے بعد لڑکے والوں کی طرف سے جو رقم قاضی کو دی جاتی ہے وہ نکاح پڑھانے کی اجرت نہیں بلکہ ایک طرح کا ہدیہ ہے، اس لئے لڑکے والوں کی طرف سے اس ہدیہ کے قبول کرنے میں کوئی حرج نہیں ہے۔

اور اگر کہیں نکاح پڑھانے کی اجرت پہلے سے طے کی جاتی ہو تو اگر قاضی کو بلانے والے لڑکی والے ہیں اور وہی طے کرکے لائے ہیں، تو اس صورت میں اس کی اجرت لڑکی والوں پر ہی ہوگی؛ کیوں کہ بلانے والے وہی لوگ ہیں، لڑکے والے پر اس کی اجرت نہیں؛ لہٰذا ان پر اس کا بار ڈالنا بھی جائز نہیں ہے؛ لیکن اگر لڑکے والے بخوشی نکاح خواں کی اجرت دے دیتے ہیں، یا لڑکے والوں نے لڑکی والوں کو نکاح خواں کو بلانے کا مکلف بنایا ہے اور ان ہی کے کہنے کے مطابق لڑکی والوں نے نکاح خواں کو بلایا ہے، تو نکاح خوانی کی اجرت لڑکے والوں کو ادا کرنی ہوگی، اور اگر کہیں قاضی کو لڑکی والے بلاتے ہیں اور اجرت لڑکے والے دیتے ہیں اور اس کا تعارف وتعامل ہوچکا ہے، تو لڑکے والوں کی طرف سے دلالۃً لڑکی والوں کے لئے اجازت ہوتی ہے، تو ایسی صورت میں بھی لڑکے والے اجرت دے سکتے ہیں؛ لیکن اس بات کو صراحت کے ساتھ طے کر لیا جائے تو زیادہ بہتر ہے۔ (مستفاد: کفایت المفتی قدیم:5/ 152) ۔

اسی طرح اگر اجرت پہلے سے طے نہ ہو تو مفضی الی النزاع نہ ہو تو ایسی اجرت لینے میں بھی کوئی حرج نہیں ہے۔