Blog

(سلسلہ نمبر: 585)

نکاح کے وقت کلمہ پڑھانا

سوال: کیا فرماتے ہیں علمائے دین ومفتیان شرع متین مسئلہ ذیل کے بارے میں

ہمارے علاقہ میں بعض نکاح خواں صاحبان نکاح کے وقت نوشہ سے تجدید ایمان بھی کراتے ہیں، تو نکاح خواں صاحبان کے اس فعل کو بعض لوگ دیوبندی بریلوی مسلک کا جھگڑا بتا کر نکاح خواں کو اس سے منع کرتے ہیں، اور بعض اس کا استہزاء کرتے ہیں، شریعت مطہرہ کی روشنی میں رہنمائی فرمائیں کہ ایسے نکاح خواں صاحبان کا عمل کس درجے میں ہے؟ بینوا توجروا۔

المستفتی: محمود اشرف حنفی، کٹرہ شہاب خان، اٹاوہ، یوپی۔

الجواب باسم الملھم للصدق والصواب: نکاح کے  وقت نوشہ کو کلمہ پڑھانا نہ ضروری ہے ، اور نہ سنت ہے اور نہ مستحب ہے ، اور نہ ہی قرآن وحدیث اور فقہ سے ثابت ہے، بلکہ بعض جگہوں پر عوام میں رائج ایک رسم ہے، اس لئے اس کو ترک کردینا چاہئے ، ہاں اگر دولہا اور دلہن میں سے کوئی ایک غیر مسلم ہو ، یا دونوں غیر مسلم ہوں تو ان کو پہلے کلمہ پڑھا کر ایمان میں داخل کرنا لازم ہے اس کے بعد نکاح پڑھایا جاسکتا ہے، یا نوشہ کا عقیدہ بالکل غیر اسلامی ہو تو احتیاطاً کلمہ پڑھا دینا چاہئے، اس لئے ایسی صورت میں اگر نکاح خواں کلمہ پڑھائے تو لوگوں کا استہزاء کرنا درست نہیں ہوگا۔ (مستفاد فتاوی محمودیہ وفتاویٰ قاسمیہ)۔