Blog

ہمارے مسائل اور ان کا حل (سلسلہ نمبر: 452)

زکوٰۃ کی ادائیگی کی شرط پر قرض دینا

سوال: کیا فرماتے ہیں مفتیان کرام درج ذیل مسئلے میں:

زید نے بکر سے پانچ لاکھ روپیے پانچ سال کے لیے قرض مانگا اور یہ کہا کہ میں تمہارے رقم کی زکوة ہر سال ادا کردیا کرونگا، بکر نے اسے منظور کرلیا تو یہ معاملہ درست ہے یا نہیں؟ اور اس طریقے پر بکر کی زکوة ادا ہوگی یا نہیں؟

دوسری صورت یہ ہے کہ بکر نے قرض اس شرط پر دیا کہ زید اس رقم کی زکوة ہر سال ادا کرتا رہے، تو یہ معاملہ درست ہے یا نہیں اور بکر کی زکوة ادا ہوگی یا نہیں؟ کچھ حضرات اس طرح کے معاملہ کو جائز کہتے ہیں، ان کے بارے میں شریعت اسلامیہ کیا کہتی ہے؟  بینوا توجروا۔

المستفتی: محمد ضیاءاللہ غازی پوری، رکن المحکمة الشرعیة۔

الجواب باسم الملھم للصدق والصواب:

 قرض دے کر زیادہ وصولنے کی شرط لگانا یا سامنے والے کے کہنے پر راضی ہونا دونوں ناجائز اور حرام ہے، اس لئے زکوٰۃ ادا کرنے کی جو شرط لگائی گئی ہے یا اس پر رضامندی کا اظہار کیا گیا ہے دونوں سود کے حکم میں ہے، اور سود کی رقم سے زکوٰۃ کی ادائیگی بھی درست نہیں بلکہ سخت گناہ کا کام ہے۔

قرض دے کر نفع حاصل کرنے کو حدیث شریف میں سود فرمایا گیا ہے، اور سود کے بارے میں حضور صلی اللہ علیہ وسلم نے فرمایا کہ اس کا کم سے کم گناہ اپنی ماں کے ساتھ زنا کرنا ہے، اس لئے سودی معاملات سے مسلمانوں کو بہت ہی سختی کے ساتھ اجتناب کرنا چاہئیے، اگر کوئی شخص جان بوجھ کر اعتقاداً سود یا کسی بھی حرام چیز کو حلال یا حلال کو حرام کہے تو وہ دائرۂ اسلام سے خارج ہوگا، اور اس کے لئے تجدید ایمان وتوبہ لازم ہوگی، اور اگر اعتقاداً تو نہیں؛ بلکہ حکم سے لاعلمی کی بنا پر کہتا ہے تو ایسے شخص کو دائرۂ اسلام سے خارج نہیں کہہ سکتے؛ تاہم اس کے لئے بھی توبہ واستغفار لازم ہے۔

نوٹ: اگر قرض لینے والا واپسی کے وقت سابقہ کسی شرط کے بغیر اپنی خوشی سے زیادہ واپس کرے تو اس کا لینا جائز ہے۔