Blog

عورت كو ملنے والے سسرالی زیورات پر قربانی وزکوٰة كس پر واجب ہے؟

سوال:  بہو کو سسرال کی طرف سے جو زیور دیا جاتا ہے اس کی زکوٰة یا قربانی کن پر واجب ہوگی؟ آیا بہو پر یا سسرال والوں پر؟ کیوں کہ لوگوں کا خیال ہے کہ بہو اس کی مالک نہیں ہوتی، شاید یہی وجہ ہے کہ طلاق وغیرہ کی صورت میں لا سمح اللہ اس کو وہ زیور واپس کرنا پڑتا ہے۔

المستفتی: محفوظ احمد ریاض

 الجواب باسم الملہم للصدق والصواب:

شریعت مطہرہ میں غیر منصوص مسائل میں عرف کا اعتبار ہوتا ہے لہذا جہاں بہو کو شادی میں زیورات عرفاً بطور عاریت دئیے جاتے ہیں (اس کی علامت طلاق کے وقت واپسی ہے) اور تمام زیورات شوہر کی ملکیت سمجھے جاتے ہیں وہاں زکوٰة اور قربانی شوہر پر واجب ہوگی بہو پر نہیں (بشرطیکہ اس کی ملکیت میں بقدر نصاب زیورات یا دوسری چیزیں نہ ہوں)؛ کیونکہ وجوب زکوٰة کیلئے ملکیت تام کا ہونا ضروری ہے۔

اور اگر زیورات کو بہو کی ملکیت میں دے دیا گیا ہے، تو زکوٰة اور قربانی بہو پر واجب ہوگی۔ (مستفاد: فتاویٰ عثمانی 42/2، کتاب الفتاویٰ 282/3)