Blog

(سلسلہ نمبر: 414)

قرض کو زیادہ وصول کرنا جائز نہیں

سوال: مفتی صاحب میں نے فروری کے مہینہ میں ایک شخص کو سات کوئنٹل گیہوں دئیے اور بات یہ ہوئی تھی کہ اپریل کے مہینے میں اس گیہوں کی قیمت اور ایک کوئنٹل گیہوں دونگا میں نے اس بات کو منظور کر لیا کہ ٹھیک ہے اور گیہوں بکا چودہ ہزار روپئے میں، اب اپریل کا مہینہ ختم ہونے کے بعد مئی کے اندر ایک کوئنٹل گیہوں دے دیا اور چودہ ہزار روپے نہیں دئے اور اسکے کچھ روز بعد پھر ایک کوئنٹل گیہوں دے دیا اور کہا کہ جب تک سات کوئنٹل گیہوں کے چودہ ہزار روپئے میں نہیں دے دیتا ہر چار مہینے میں ایک ایک کوئنٹل گیہوں دے دیا کرونگا تو کیا اس طریقے سے گیہوں لینا درست ہے کہ نہیں اور یہ سب کچھ اس کی مرضی سے اسنے کیا ہے میں نے اسکے آگے کوئی بھی شرط نہیں رکھی، میں نے بس شروع میں صرف یہ کہا تھا کہ میں اپنے گیہوں مہنگے داموں پر فروخت کرونگا، جواب ارشاد فرمائیں۔

المستفتی: حکیم محمد اشرف امروہوی بنگلور۔

الجواب باسم الملھم للصدق والصواب:

صورت مسئولہ میں گیہوں کے دام کے علاوہ ہر چار مہینہ میں ایک کوئنٹل گیہوں لینا درست نہیں ہے کیونکہ سامنے والا آپ سے اس معاملہ کی صراحت کر رہا ہے اور آپ خاموش ہیں یعنی آپ کو یہ معاملہ منظور ہے، حالانکہ قرض سے فایدہ اٹھانے کو حدیث شریف میں سود بتایا گیا ہے، البتہ اگر اس طرح کی کوئی بات نہ ہوتی اور سامنے والا ادائیگی کے وقت اپنی مرضی سے کچھ زیادہ رقم یا رقم کے ساتھ گیہوں دیتا تو اس کا لینا جائز ہوتا؛ لیکن سوال میں جو صورت معلوم کی گئی ہے وہ شرعاً ناجائز ہے۔