Blog

نئی قبر کے اوپر راستہ اور پلر بنانا

سوال: ہمارے شہر کاٹھمنڈو میں حکومت کی جانب سے دی گئی ایک پرانی قبرستان ہے جو عام مسلمانوں کے لئے ہے، اسکے انتظام و دیکھ بھال کے لئے ایک کمیٹی تجویز کی گئی ہے، جس میں چند افراد شامل ہیں، کمیٹی نے آپس میں مشورہ کرکے قبرستان کے اوپر مٹی بھرنے کی ضرورت محسوس کی؛ لہذا اب اس قبرستان می‍ں  اوپر سے پانچ فٹ مٹی بھری جارہی ہے اور قبرستان کے بیچ سے کچھ راستے نکالے جارہے ہیں جس کی وجہ سے کچھ قبروں کے اوپر پلر قائم کیا گیا ہے، ایک قبر ابھی چار ماہ کی ہے، اس کے اوپر پلر کھڑا کیا گیا ہے، اہل خانہ قبرستان کمیٹی سے سخت ناراض ہے، معاملہ اختلاف وانتشار تک پہونچ گیا ہے۔

اب سوال یہ ہے کہ کیا قبرستان کمیٹی کا یہ فیصلہ درست ہے؟ ایسے قبرستان پر اوپر سے مٹی بھرنا اور درمیان سے کچہ راستے نکالنا اور قبروں کے اوپر اسطرح پلر کھڑا کرنا شرعا درست ہے؟ برائے کرم مدلل جواب عنایت فرمائیں. 

المستفتی: مفتی ابوبکر صدیق قاسمی دارالافتاء والقضاء نیپالی جامع مسجد کاٹہمنڈو نیپال۔

الجواب باسم الملہم للصدق والصواب:

 صورت مسئولہ میں اگر قبرستان میں مٹی کی ضرورت ہے تو مٹی ڈالی جاسکتی ہے البتہ مٹی ڈالنے کے لئے بغیر سخت مجبوری کے ٹریکٹر ٹرالی اور جے سی بی وغیرہ قبروں کے اوپر نہ چلائیں؛ بلکہ مزدوروں کے ذریعہ مٹی ڈلوائیں اور برابر کروائیں؛ لیکن راستہ اور پلر ایسی جگہوں پر بنائیں جہاں نئی قبر نہ ہوں، اگر قبر نئی ہو تو اس پر راستہ بنانا یا پلر کھڑا کرنا درست نہیں، اس لئے کمیٹی والے جس نئی قبر پر پلر کھڑا کر رہے ہیں وہ بالکل غلط ہے اور لوگوں کا اعتراض درست ہے، کمیٹی والوں کو اس جگہ سے ہٹ کر دوسری جگہ پلر بنانا چاہئیے تاکہ اختلاف وانتشار کی نوبت نہ آئے۔