اعتکاف کی قضا، سنت اعتکاف کی قضا، سنت اعتکاف

رمضان المبارک کے مسنون اعتکاف کی قضا

سوال: کیا فرماتے ہیں علمائے دین ومفتیانِ شرع متین مسئلہ ذیل کے بارے میں کہ زید نے رمضان کے آخری عشرے کا اعتکاف کیا، ایک دن کسی شخص نے کہا کہ آپ کا پوتا میرا آم توڑ رہا ہے، زید مسجد سے باہر نکل آیا اور اپنے پوتے کو تنبیہ کرکے مسجد واپس آگیا، بعد میں معلوم ہوا کہ مسجد سے نکلنے کی وجہ سے اعتکاف فاسد ہوگیا۔

اب معلوم یہ کرنا ہے کہ پورے عشرے کے اعتکاف کی قضا کرنی ہوگی یا صرف ایک دن کی قضا سے کام چل جائے گا؟ نیز اس اعتکاف کی قضا کسی رمضان میں کرنا چاہے تو کر سکتا ہے یا غیر رمضان میں قضا کرنی ہوگی؟ برائے مہربانی تسلی بخش جواب عنایت فرماکر مشکور ہوں۔

المستفتی : عبداللہ قاسمی چورسنڈ جون پور

الجواب باسم الملهم للصدق والصواب:

رمضان المبارک کے مسنون اعتکاف میں سے اگر کسی دن کا اعتکاف کسی وجہ سے فاسد ہو جائے تو اس کی قضا کے بارے میں اختلاف ہے امام ابو یوسف رحمہ اللہ کے نزدیک پورے عشرے کی قضا کرنی پڑے گی اور امام ابو حنيفہ وامام محمد علیہما الرحمہ کے نزدیک صرف اس دن کی قضا کر لینے سے کام چل جائے گا؛ لیکن اختلاف سے بچنے کے لیے اگر پورے دس دن کی قضا کر لے تو بہتر ہے۔

اس اعتکاف کی قضا اگر رمضان میں کرنا چاہے تو کر سکتا ہے اور اگر غیر رمضان میں قضا کرے گا تو دن میں روزہ رکھنا بھی ضروری ہے۔

الدلائل

لوشرع فی المسنون أعني العشر الأواخر بنیته ثم أفسده أن یجب قضاؤه تخریجاً علی قول أبی یوسفؒ (إلیٰ قوله) یلزمه قضاء العشر. (ردالمحتار: الصوم/ الاعتکاف، زکریا دیوبند 3/434، کراچی 2/4444).

ثم رأیت المحقق ابن الهمام قال: ومقتضی النظر لو شرع في المسنون أعني العشر الأواخر بنیته ثم أفسده أن یحب قضائه تخریجا علیٰ قول أبي یوسف في الشروع في نفل الصلاة ناویا أربعاً لا علیٰ قولهما أي یلزمه قضاء العشر کله لو أفسد بعضه کما یلزمه قضاء أربع لوشرع في نفل ثم أفسد الشفع الأول عند أبي یوسف… فیظهر من بحث ابن الهمام لزوم الاعتکاف المسنون بالشروع وإن لزوم قضاء جمیعه أو باقیه مخرّج علیٰ قول أبي یوسف، أما علی قول غیره فیقضي الیوم الذي أفسده لاستقلال کل یوم بنفسه. (رد المحتار: 2/131).

والله أعلم وعلمه

حرره العبد محمد شاکر نثار المدني القاسمي غفرله، أستاذ الحديث والفقه بالمدرسة الإسلامية العربية، بيت العلوم سرائمير أعظم جره الهند.

29/8/1439ه 16/5/2018م الأربعاء

۞۞۞۞۞۞