بغیر دانت کے ایک سال والے بکرے کی قربانی

سوال: کیا فرماتے ہیں علمائے دین ومفتیانِ شرع متین مسئلہ ذیل کے بارے میں:

ایسا بکرا جو ایک سال کا ہے؛ لیکن اس کے اصل دانت ابھی نہیں نکلے ہیں، کیا اس کی قربانی کی جاسکتی ہے یا اصل دانت کا نکلنا ضروری ہے؟

برائے کرم تشفی بخش جواب عنایت فرمائیں۔

المستفتی : منظر کمال ندوی مئو۔

الجواب باسم الملہم للصدق والصواب:

حدیث شریف میں مسنہ کی قربانی کا حکم دیا گیا ہے اور جب جانور کے دودھ کے دانت دوسرے نئے دانت نکلنے کی وجہ سے گر جائیں تو وہ مسنة کہلاتا ہے۔ (المصباح المنیر: 1/291، طبع: المکتبة العلمیة، بیروت، لسان العرب: 13/222، طبع: دار صادر، بیروت) عموماً منڈیوں میں دھوکا دینے کے لیے بعض لوگ جانور کے دانت خود توڑ دیتے ہیں اور کہتے ہیں کہ یہ دانتا ہوگیا ہے؛ لیکن یہ بات یاد رہے کہ دانتا اس وقت ہوگا جب اس کے ثنایا طلوع ہوں گے، دودھ کے دانتوں کا ٹوٹ جانا ہی کافی نہیں بلکہ نئے دانتوں کا نکلنا بھی مسنة ہونے کی شرط ہے۔ اور دانت کا نکلنا ایک سال سے زائد ہونے کی دلیل ہے، اس لئے ایسا بکرا جس کے دانت نہ نکلے ہوں بشرطیکہ وہ چارہ کھا لیتا ہو، اور اس کے بارے میں یقین کے ساتھ معلوم ہوکہ ایک سال کا ہوچکا ہے تو اس کی قربانی جائز ہے، اور جس کی عمر یقین کے ساتھ معلوم نہ ہو اس کا دانت دیکھ کر قربانی کی جائے۔ واللہ اعلم بالصواب۔

الدلائل

عن جابر رضي اللّٰه عنه قال: قال رسول اللّٰه ﷺ: لا تذبحوا إلا مسنة الخ. (مشکاة المصابیح عن صحیح مسلم 1/ 127)

ویجوز من جمیع هٰذه الأقسام الثني وهو المراد من المسنة، وهو من الإبل ماستکمل خمس سنین، ومن الغنم الخ ما استکمل سنة. (حاشیة: مشکاة المصابیح 1/ 127)

وفي بدائع الصنائع: وأما الهتماء: وهي التي لا أسنان لها، فإن کانت ترعي وتعتلف جازت وإلا فلا. (بدائع الصنائع 4/ 215 زکریا، الهدایة 4/ 448 مکتبه بلال دیوبند)

وأما الهتماء: وھي التي لا أسنان لها، فقد روي عن هشام عن أبي یوسف أنه لا یجوز، سواء کانت تعتلف أو لا تعتلف، فإن بقي بعض أسنانها إن کانت تعتلف بما بقي من الأسنان جاز وما لا فلا۔ وفي جامع الجوامع عن أبي حنیفة: التي لا سن لها، ولا تعتلف جاز وإلا فلا. وفي الیتیمة: کتبت إلی أبي الحسن علي المرغینان، إن کانت تعتلف. (الفتاویٰ التاتارخانیة، کتاب الأضحیة/ الفصل الخامس في بیان ما یجوز من الضحایا وما لا یجوز 17/ 428 رقم: 27722 زکریا).

والله أعلم

تاريخ الرقم: 8- 12 – 1439 ھ 20-8-2018م الاثنين