Blog

(سلسلہ نمبر: 644)

تراویح میں ثنا اور تعوذ وغیرہ کا حکم

سوال: کیا فرماتے ہیں مفتیان کرام مسئلہ ذیل کے بارے میں: اکثر تراویح میں دیکھا جاتا ہے کہ حفاظ نیت باندھتے ہی فاتحہ شروع کر دیتے ہیں، اسی طرح رکوع وسجدہ بہت جلدی جلدی کرتے ہیں، قومہ اور جلسہ میں بھی بہت عجلت سے کام لیتے ہیں، تو معلوم یہ کرنا ہے کہ تراویح کی نماز میں اس طرح کی شرعاً کوئی رعایت ہے یا نہیں؟

المستفتی: حافظ محمد ثاقب قاسمی، کسہا اعظم گڑھ۔

الجواب باسم الملھم للصدق والصواب: سوال میں مذکورہ باتیں بڑی افسوسناک ہیں، ایسا معلوم ہوتا ہے کہ تراویح کوئی بوجھ ہے جس کو اپنے ذمہ سے اتارنے کی جلدی مچی رہتی ہے، اللہ صحیح سمجھ نصیب فرمائے۔

جاننا چاہئےکہ تراویح کی نماز میں بھی ہر دو رکعت کے شروع میں ثناء ، تعوذ اور بسم اللہ پڑھنے کا وہی حکم ہے جو دوسری نمازوں میں ہے ، اس لئے عجلت کی وجہ سے ان کا چھوڑ دینا ، اسی طرح رکوع اور سجدے اور دونوں سجدوں کے درمیان کے وقفہ کو اتنی جلدی ادا کرنا کہ طمانینت کے ساتھ یہ ادا نہ ہو پائیں درست نہیں ہے ، علامہ ابن نجیم مصری علیہ الرحمہ نے ان سب کو نماز تراویح کے منکرات میں شمار کیا ہے. (مستفاد کتاب الفتاوی).